Ashok Leyland: పాత వాహనాల కోసం అశోక్‌ లేల్యాండ్‌ ఇ-మార్కెట్‌ ప్లేస్‌

ఇంటర్నెట్‌డెస్క్‌: పాత వాణిజ్య వాహనాల మార్పిడి కోసం హిందుజా గ్రూప్‌నకు చెందిన అశోక్‌లే ల్యాండ్‌ (Ashok Leyland) సంస్థ కొత్త ఇ-మార్కెట్‌ప్లేస్‌ను అందుబాటులోకి తెచ్చింది. ‘Re-AL’ పేరిట దీన్ని తీసుకొచ్చినట్లు అశోక్‌ లేల్యాండ్‌ ప్రకటించింది. కస్టమర్లు తమ పాత వాహనాలను మార్చుకోవటానికి ఇ-మార్కెట్‌ స్పేస్ ఉపయోగకరంగా ఉంటుందని తెలిపింది. తమ పాత వాహనాల వివరాలను ఇ-మార్కెట్‌ స్పేస్‌లో నమోదుచేసుకొని సులభంగా  అశోక్‌ లేల్యాండ్‌కు చెందిన బస్సులు, ట్రక్కులకు కొనుగోలు చేయవచ్చని తెలిపింది.

‘‘పాత వాణిజ్య వాహనాల పరిశ్రమ అవాంతరాలు ఎదుర్కొంటోంది. వాటిని నివారించటం కోసమే ఈ డిజిటల్‌ వేదికను తీసుకొచ్చాం. దీని ద్వారా కస్టమర్ల సందేహాలు పరిష్కరిస్తాం. వారు తెలిపిన సమాచారం ప్రకారం వాహనానికి మంచి విలువను నిర్ణయిస్తాం. మా డిజిటల్ ప్రయణంలో ఇదొక ముందడుగు’’ అని అశోక్‌ లేల్యాండ్‌ ఎండీ, సీఈఓ షేను అగర్వాల్‌ తెలిపారు. ‘మా ఇ-మార్కెట్‌ప్లేస్‌లో కస్టమర్లకు తమ పాత వాహనాల రీసేల్‌కు మంచి విలువ దొరుకుతుంది. తమ పాత వాహనాలకు బదులు అశోక్ లేల్యాండ్ కొత్త ట్రక్కులు, బస్సులుగా మార్చుకోవటానికి సహాయపడుతుంది’ అని సంస్థ అధ్యక్షుడు సంజీవ్‌ కుమార్‌ తెలిపారు.