ATF: విమాన ఇంధన ధర.. కిలోలీటర్‌పై రూ.20,000 పెంపు

దిల్లీ: దేశంలో విమాన ఇంధనం ఏవియేషన్ టర్బైన్ ఫ్యూయల్‌(ఏటీఎఫ్) ధరలు రికార్డు స్థాయిలో పెరిగాయి. గతంలో ఎన్నడూ లేని విధంగా 16 శాతం పెరిగి, ఆకాశన్నంటుతున్నాయి. ఈ మేరకు చమురు సంస్థలు గురువారం నోటిఫికేషన్ విడుదల చేశాయి. ఈ రోజు నుంచే ఈ ధరలు అమల్లోకి వస్తాయి. ఈ రికార్డు స్థాయి ఇంధన ధరతో విమాన టికెట్‌ ధరలు పెరగడం అనివార్యంగా కనిపిస్తోంది. ప్రస్తుతం దేశరాజధాని దిల్లీలో ఈ ధర కిలోలీటరుకు రూ.19,757.13(16.26 శాతం)పెరిగి, 1,41,232.87 కి చేరింది. ఆయా రాష్ట్రాల్లో స్థానికంగా ఉన్న పన్నులను బట్టి ఈ ధరల్లో మార్పులు ఉంటాయి. 

విమాన ఇంధన ధర కిలోలీటరుకు..

కోల్‌కతా ... రూ.1,46,322.23 
ముంబయి ... రూ.1,40,092.74
చెన్నై ... రూ.1,46,215.85

ఇదిలా ఉంటే ఈ నెల ప్రారంభంలో ఇండియన్ ఆయిల్ కార్పొరేషన్ ఈ ధరల్ని తగ్గించింది. ఈ ఏడాదిలో తగ్గింపు అదే తొలిసారి. అంతర్జాతీయ మార్కెట్‌లో చమురు ధరలు దేశీయంగా ప్రభావం చూపుతుంటాయి. రష్యా-ఉక్రెయిన్‌ యుద్ధం ప్రారంభమైన తర్వాత సరఫరా సమస్యలు తలెత్తి ధరలు మరింత ఎగబాకాయి. భారత్‌ చమురు అవసరాల్లో 85 శాతం దిగుమతులపైనే ఆధారపడుతోంది. విమానయాన వ్యయాల్లో 40 శాతం వాటా ఇంధనానిదే. దీంతో ఇంధన ధరలు పెరిగినా, తగ్గినా ఆ ప్రభావం విమాన ప్రయాణాలపై ఉంటుంది.