Ather: ఏథర్‌ కొత్త మైలురాయి.. లక్ష వాహనాల ఉత్పత్తి

ఇంటర్నెట్‌డెస్క్‌: ప్రముఖ విద్యుత్‌ స్కూటర్ల తయారీ సంస్థ ఏథర్‌ (Ather) ఎనర్జీ రికార్డు స్థాయిలో వాహనాలను ఉత్పత్తి చేసింది. ఈ ఏడాది జనవరిలో లక్షకు పైగా ఎలక్ట్రిక్‌ స్కూటర్లను తయారు చేసినట్లు తెలిపింది. విద్యుత్‌ ద్విచక్ర వాహనాలపై ఆదరణ పెరగటంతో తయారీ రంగంలో వృద్ధి సాధించగలిగామని పేర్కొంది. సరికొత్త మైలురాయిని చేరుకోవటంపై కంపెనీ సీఈఓ తరుణ్‌ మెహతా ఆనందం వ్యక్తం చేశారు. 

గత కొన్ని నెలలుగా ఏథర్ విద్యుత్‌ వాహనాలు రికార్డు స్థాయిలో అమ్ముడవుతున్నాయి. గతేడాది ఆగస్టులో ఏకంగా 50 వేల ఏథర్‌ విద్యుత్‌ వాహనాలు విక్రయించినట్లు కంపెనీ తెలిపింది. మరోవైపు విద్యుత్‌ వాహనాల విక్రయాలు దేశీయంగా పెరుగుతున్నాయి. కేంద్ర ప్రభుత్వ సహకారం కూడా ఇందుకు తోడ్పాటునందిస్తోంది. మరిన్ని కంపెనీలు ఈ రంగంలోకి అడుగు పెట్టే అవకాశం ఉంది. అత్యాధునిక హంగులు, సరికొత్త ఫీచర్లతో అనేక రకాల బ్రాండ్లు అందుబాటులో ఉండటంతో విద్యుత్‌ వాహనాలు వినియోగదారులను ఆకర్షిస్తున్నాయి.