Audi price hike: ఆడీ క్యూ3 మోడల్‌ కార్ల ధరల పెంపు.. మే 1 నుంచి అమల్లోకి

దిల్లీ: జర్మనీకి చెందిన కార్ల తయారీ సంస్థ ఆడీ తమ క్యూ3 మోడల్‌ కార్ల ధరలను పెంచనుంది. క్యూ3, క్యూ3 స్పోర్ట్‌బ్యాక్‌ ధరలను 1.6 శాతం పెంచుతున్నట్లు ప్రకటించింది. మే 1 నుంచి కొత్త ధరలు అమల్లోకి రానున్నాయి. తయారీ వ్యయాలు పెరగడంతో పాటు కస్టమ్స్‌ సుంకాలు పెరిగిన కారణంగానే ధరల్ని సవరించాల్సి వస్తోందని ఆడీ పేర్కొంది. ఇప్పటికే ఏప్రిల్‌ 1 నుంచి క్యూ8 సెలబ్రేషన్‌, ఆర్‌ఎస్‌5, ఎస్‌5 ధరల్ని 2.4 శాతం పెంచింది.

మరో లగ్జరీ కార్ల తయారీ సంస్థ మెర్సిడెస్‌ బెంజ్‌ సైతం ఏప్రిల్‌ 1 నుంచి కార్ల ధరల్ని పెంచింది. మోడల్‌ను బట్టి రూ.2 లక్షల నుంచి రూ.12 లక్షల వరకు పెంపును అమలు చేసింది. నిర్వహణ, తయారీ వ్యయాలు పెరగడమే దీనికి కారణమని పేర్కొంది. వీటితో పాటు మారుతీ మరిన్ని వాహన తయారీ సంస్థలు సైతం కార్ల ధరల్ని పెంచాయి.