Landmark Cars IPO: 13న ల్యాండ్‌మార్క్‌ కార్స్‌ ఐపీఓ.. ధరల శ్రేణి రూ.481-506

దిల్లీ: ఆటోమొబైల్‌ డీలర్‌షిప్‌ చైన్‌ ల్యాండ్‌మార్క్‌ కార్స్‌ లిమిటెడ్‌ తమ ఐపీఓ (Landmark Cars IPO) ధరల శ్రేణిని రూ.481-506గా నిర్ణయించింది. ఈ కంపెనీ పబ్లిక్ ఇష్యూ డిసెంబరు 13 నుంచి 15 వరకు జరగనుంది. రూ.150 కోట్లు విలువ చేసే తాజా షేర్లతో పాటు రూ.402 కోట్లు విలువ చేసే షేర్లు ఆఫర్‌ ఫర్‌ సేల్‌ (OFS) కింద ఐపీఓలో అందుబాటులో ఉండనున్నాయి.

సమీకరించిన నిధుల నుంచి రూ.120 కోట్లు రుణ భారాన్ని తగ్గించుకోవడానికి, ఇతర సాధారణ కార్పొరేట్‌ అవసరాలను వినియోగించనున్నారు. ఇష్యూ (IPO) పరిమాణంలో 50 శాతం అర్హతగల సంస్థాగత మదుపర్లు, 35 శాతం రిటైల్‌ మదుపర్లు, 15 శాతం సంస్థాగతేతర మదుపర్లకు రిజర్వు చేశారు. మదుపర్లు కనీసం 29 ఈక్విటీ షేర్లకు (ఒక లాట్‌) బిడ్లు దాఖలు చేయాల్సి ఉంటుంది. యాక్సిస్‌ క్యాపిటల్‌, ఐసీఐసీఐ సెక్యూరిటీస్‌ ఈ ఐపీఓకి లీడ్‌ మేనేజర్లుగా వ్యవహరిస్తున్నాయి. ఈ కంపెనీ షేర్లు ఎన్‌ఎస్‌ఈ, బీఎస్‌ఈలో డిసెంబరు 23న లిస్ట్‌ కానున్నాయి.

టీపీజీ మద్దతు గల ల్యాండ్‌మార్క్‌ కార్స్‌ (Landmark Cars IPO) దేశంలో ప్రీమియం కార్ల రిటైల్‌ విక్రయాలకు వేదికగా ఉంది. ఇది మెర్సిడెస్‌ బెంజ్‌, హోండా, జీప్‌, ఫోక్స్‌వ్యాగన్‌, రెనోకు రిటైల్‌ డీలర్‌గా వ్యవహరిస్తోంది. కొత్త వాహనాల విక్రయాలతో పాటు విడిభాగాలు, ల్యూబ్రికెంట్స్‌, యాక్సెసరీస్‌ విక్రయాలు, మరమ్మతుల వంటి సేవలనూ అందిస్తోంది. అలాగే పాత కార్ల క్రయ విక్రయ వ్యాపారాన్నీ నిర్వహిస్తోంది. 2020 ఆర్థిక సంవత్సరంలో ఈ కంపెనీ రూ.28.93 కోట్ల నష్టాన్ని నివేదించింది. బీఎస్‌-IV కార్ల స్టాక్‌ను పూర్తిగా విక్రయించడం కోసం కంపెనీ భారీ ఎత్తున రాయితీలు కల్పించడమే దీనికి కారణం.