Axis Bank Q3 Results: యాక్సిస్‌ బ్యాంక్ లాభం 62 శాతం వృద్ధి

దిల్లీ: ప్రైవేటు రంగ యాక్సిస్‌ బ్యాంక్ (Axis Bank) ప్రస్తుత ఆర్థిక సంవత్సరం మూడో త్రైమాసిక ఫలితాలను సోమవారం ప్రకటించింది. డిసెంబర్‌తో ముగిసిన త్రైమాసికంలో స్టాండలోన్‌ ప్రాతిపదికన రూ.5,853 కోట్ల నికర లాభం ఆర్జించింది. గతేడాది ఇదే త్రైమాసికంలో కంపెనీ లాభం రూ.3,614 కోట్లుగా ప్రకటించింది. గతేడాదితో పోలిస్తే కంపెనీ లాభం 62 శాతం వృద్ధి చెందింది.

బ్యాంక్‌ మెత్తం ఆదాయం రూ.21,101 కోట్ల నుంచి రూ.26,892 కోట్లకు పెరిగిందని యాక్సిస్‌ బ్యాంక్‌ తెలిపింది. వడ్డీ ద్వారా వచ్చే నికర ఆదాయం 32 శాతం పెరిగి రూ.11,459  కోట్లుగా నమోదయిందని పేర్కొంది. నికర వడ్డీ మార్జిన్ 4.26 శాతంగా ఉందని వెల్లడించింది. స్థూల నిరర్థక ఆస్తులు (NPA) 3.17 శాతం నుంచి 2.38 శాతానికి చేరాయని, నికర నిరర్థక ఆస్తులు 0.91 శాతం నుంచి 0.47 శాతానికి తగ్గినట్టు పేర్కొంది.