Bank of England: వడ్డీ రేట్లు పెంచిన బ్యాంక్‌ ఆఫ్‌ ఇంగ్లాండ్‌

లండన్‌: ద్రవ్యోల్బణం కట్టడిలో భాగంగా బ్రిటన్‌ సెంట్రల్‌ బ్యాంక్‌.. బ్యాంక్‌ ఆఫ్‌ ఇంగ్లాండ్‌ (Bank of England) సైతం వడ్డీ రేట్లను (Interest rates) పెంచింది. పావు శాతం మేర వడ్డీ రేట్లు పెంచుతున్నట్లు గురువారం ప్రకటించింది. మున్ముందు ద్రవ్యోల్బణం తగ్గుముఖం పడుతుందని అంచనా వేసింది. వడ్డీ రేట్ల పెంపునకు సంబంధించి మానిటరీ కమిటీలో ఏడుగురు అనుకూలంగా ఓటేయగా.. ఇద్దరు మాత్రం వ్యతిరేకించారు. తాజా పెంపుతో వడ్డీ రేట్లు 4.25 శాతానికి పెరిగింది. 2021 డిసెంబర్‌ నుంచి వడ్డీ రేట్లు పెంచుతూ వస్తున్న బ్యాంక్‌ ఆఫ్‌ ఇంగ్లాండ్‌ వడ్డీ రేట్లు పెంచడం ఇది 11వ సారి.

మరోవైపు అమెరికా ఫెడరల్‌ రిజర్వ్‌ సైతం వడ్డీరేటును మరో 25 బేసిస్‌ పాయింట్లు (0.25%) బుధవారం పెంచింది. తద్వారా రుణ రేటు 4.75-5 శాతానికి పెరిగింది. అమెరికాలో సిలికాన్‌ వ్యాలీ బ్యాంక్‌, సిగ్నేచర్‌ బ్యాంక్‌ల వైఫల్యంతో పాటు ఐరోపాలో క్రెడిట్‌ సూయిజ్‌ సంక్షోభం కారణంగా ఏర్పడ్డ గడ్డు పరిస్థితుల్లో కేంద్ర బ్యాంకులు వడ్డీరేట్ల పెంపునకు తాత్కాలికంగానైనా బ్రేక్‌ ఇవ్వొచ్చని విశ్లేషకులు భావించారు. అయితే, అమెరికా, ఇంగ్లాండ్‌ సెంట్రల్‌ బ్యాంకులు రేట్ల పెంపునకే మొగ్గు చూపడం గమనార్హం.