అదానీ గ్రూప్‌కిచ్చిన రుణాలు తక్కువే.. బ్యాంకులకు రిస్క్‌ లేదు: రేటింగ్‌ ఏజెన్సీలు

దిల్లీ: హిండెన్‌ వ్యవహారం నేపథ్యంలో అదానీ గ్రూప్‌నకు (Adani Group) రుణాలు ఇచ్చిన బ్యాంకులు గురించి చర్చ జరుగుతోంది. అదానీ గ్రూప్‌ షేర్లు ఇటీవల తీవ్ర ఒడుదొడుకులకు లోనైన నేపథ్యంలో రుణాలిచ్చిన బ్యాంకులకూ ప్రమాదం పొంచి ఉందన్న వాదనలు వినిపించాయి. ఈ నేపథ్యంలో అంతర్జాతీయ రేటింగ్‌ సంస్థలైన ఫిచ్‌, మూడీస్‌ స్పందించాయి. అదానీ గ్రూప్‌నకు భారతీయ బ్యాంకులు ఇచ్చిన రుణ మొత్తం అధికమేమీ కాదని, కాబట్టి పెద్ద ఇబ్బందేమీ లేదని పేర్కొన్నాయి.

అదానీ గ్రూప్‌నకు భారతీయ బ్యాంకులు ఇచ్చిన రుణమొత్తం తక్కువే కాబట్టి వాటి క్రెడిట్‌ ప్రొఫైల్‌కు ఎలాంటి నష్టం ఉండబోదని ఫిచ్‌ రేటింగ్స్‌ అభిప్రాయపడింది. అదానీ గ్రూప్‌నకు ప్రైవేటు బ్యాంకులతో పోలిస్తే ప్రభుత్వ రంగ బ్యాంకులే అధికమొత్తంలో రుణాలు సమకూర్చాయని మూడీస్‌ పేర్కొంది. అయినా అది మొత్తం రుణాల్లో ఒక శాతం లోపేనని తెలిపింది. ఒకవేళ అదానీ మరింతగా రుణాలపై ఆధారపడితే బ్యాంకులకు ప్రమాదం ఉండొచ్చని మూడీస్‌ అభిప్రాయపడింది. అయితే, రిస్క్ కారణంగా అంతర్జాతీయ మార్కెట్ల నుంచి మాత్రం అదానీ గ్రూప్‌నకు నిధుల ప్రవాహం తగ్గే అవకాశం ఉందని తెలిపింది.

అమెరికాకు చెందిన షార్ట్‌ సెల్లింగ్‌ సంస్థ హిండెన్‌ బర్గ్‌ రీసెర్చి నివేదిక తర్వాత అదానీ గ్రూప్‌ షేర్లు తీవ్ర ఒత్తిడిని ఎదుర్కొన్నాయి. కోట్లాది రూపాయల సంపద హరించుకుపోయింది. ఈ క్రమంలో బ్యాంకులు, ఆర్థిక సంస్థలు అందించిన రుణాలపైనా చర్చ జరిగింది. దీంతో ఆయా బ్యాంకులు తమ రుణ మొత్తాలను వెల్లడించాయి. ఎస్‌బీఐ రూ.27వేల కోట్లు, పంజాబ్‌ నేషనల్‌ బ్యాంక్‌ రూ.7వేల కోట్లు అదానీ గ్రూప్‌నకు రుణం ఇచ్చినట్లు పేర్కొన్నాయి. తమ రుణాల్లో అదానీ గ్రూప్‌ వాటా 0.94 శాతంగా యాక్సిస్‌ బ్యాంక్‌ పేర్కొంది.