Airtel Q3 results: ఎయిర్‌టెల్‌ నికర లాభాల్లో 3% క్షీణత

ముంబయి: 2021-22 ఆర్థిక సంవత్సరం డిసెంబరుతో ముగిసిన త్రైమాసికంలో దేశీయ టెలికాం దిగ్గజం భారతీ ఎయిర్‌టెల్ ఏకీకృత ప్రాతిపదికన రూ.830 కోట్ల నికర లాభాలను ప్రకటించింది. గతేడాది ఇదే త్రైమాసికంలో కంపెనీ రూ.854 కోట్ల లాభాలు నమోదు చేసింది. లాభాల్లో 2.8 శాతం క్షీణత నమోదైంది. గత ఆర్థిక సంవత్సరం ఇదే కాలంలో రూ.26,518 కోట్లుగా ఉన్న కంపెనీ ఆదాయం 12.6 శాతం పెరిగి ఈసారి రూ.29,867 కోట్లకు చేరింది. ఈ మేరకు మంగళవారం సమర్పించిన రెగ్యులేటరీ ఫైలింగ్‌లో పేర్కొంది. 

టారిఫ్‌లను పెంచడం, సబ్‌స్క్రైబర్ల సంఖ్యలో పెరుగుదల వల్ల ఆదాయానికి మద్దతు లభించిందని కంపెనీ ఓ ప్రకటనలో తెలిపింది. వినియోగదారు సగటు ఆదాయం (ARPU) గతేడాది రూ.146 నుంచి ఈసారి రూ.163కు పెరిగినట్లు కంపెనీ తెలిపింది. సమీక్షించిన త్రైమాసికంలో ఎయిర్‌టెల్ దేశీయ ఆదాయం 18 శాతం పెరిగి రూ.20,913 కోట్లకు చేరింది. మొత్తంగా కంపెనీ ఫలితాలు విశ్లేషకుల అంచనాలను మాత్రం అందుకోలేకపోయాయి. ఈరోజు ట్రేడింగ్‌లో ఎయిర్‌టెల్‌ షేరు రూ.706.95 వద్ద ఫ్లాట్‌గా స్థిరపడింది.