BSNL నుంచి అదిరిపోయే బ్రాడ్‌బ్యాండ్‌ ప్లాన్‌.. 75 రోజులకు ₹275 మాత్రమే!

ఇంటర్నెట్‌ డెస్క్‌: ప్రభుత్వరంగ టెలికాం సంస్థ BSNL బ్రాడ్‌బ్యాండ్‌ సేవలకు సంబంధించి సరికొత్త ఆఫర్‌ను ప్రకటించింది. కొత్త వినియోగదారులను ఆకట్టుకోవడంలో భాగంగా రూ.275కే బ్రాడ్‌బ్యాండ్‌ సేవలను ప్రకటించింది. స్వాతంత్ర్యం వచ్చి 75 ఏళ్లు పూర్తి చేసుకున్న సందర్భంగా ఈ ఆఫర్‌ను ప్రకటించింది. అయితే, తొలి 75 రోజుల వరకే ఈ ఆఫర్‌ వర్తిస్తుంది. అనంతరం ప్లాన్‌ మొత్తాన్ని చెల్లించాల్సి ఉంటుంది.

BSNL ప్రకటించిన ఈ ఆఫర్‌ ప్రకారం.. కొత్తగా బ్రాడ్‌బ్యాండ్‌ తీసుకునే వినియోగదారులకు ఈ ఆఫర్‌ వర్తిస్తుంది. ఎంట్రీ లెవల్‌ ప్లాన్లు అయిన రూ.449, రూ.599కు ఈ ఆఫర్‌ వర్తిస్తుంది. తొలి 75 రోజుల పాటు ఈ ప్లాన్లు రూ.275కే అందిస్తారు. ఇక ప్లాన్ల వివరాల విషయానికొస్తే రూ.449 ప్లాన్‌పై 30 ఎంబీపీఎస్‌ వేగంతో 3.3 టీబీ నెలవారీ డేటా పొందొచ్చు. డేటా పరిమితి దాటాక వేగం 2 ఎంబీపీఎస్‌కు తగ్గుతుంది. రూ.599 ప్లాన్‌పై 60 ఎంబీపీఎస్‌ వేగంతో 3.3 టీబీ డేటాను పొందొచ్చు. నెలవారీ పరిమితి దాటాక వేగం 2ఎంబీపీఎస్‌కు పడిపోతుంది.

దీంతో పాటు రూ.999 పైనా బీఎస్‌ఎన్‌ఎల్‌ ఇలాంటి ఆఫర్‌నే ప్రకటించింది. తొలి 75 రోజుల పాటు ఈ ప్లాన్‌కు రూ.775 మాత్రమే చెల్లించాల్సి ఉంటుంది. ఈ ప్లాన్‌లో 150 ఎంబీపీఎస్‌ వేగంతో డేటా లభిస్తుంది. 2 టీబీ వరకు ఈ వేగాన్ని ఆనందించొచ్చు. ఈ ప్లాన్‌లో ఓటీటీ ప్రయోజనాలను కూడా బీఎస్‌ఎన్‌ఎల్‌ అందిస్తోంది. డిస్నీ+ హాట్‌స్టార్‌, హంగామా, సోనీలివ్‌, జీ5, వూట్‌, యుప్‌టీవీ, లయన్స్‌గేట్‌ ఓటీటీలు ఫ్రీగా లభిస్తాయి. ఈ ప్లాన్లన్నీ సెప్టెంబర్‌  13 వరకు మాత్రమే అందుబాటులో ఉంటాయని బీఎస్‌ఎన్‌ఎల్‌ పేర్కొంది. మరిన్ని ప్లాన్ల వివరాల కోసం BSNL వెబ్‌సైట్‌ను సందర్శించండి.