Microsoft - ChatGPT: మైక్రోసాఫ్ట్‌ ‘ChatGPT’ వచ్చేసింది.. ఎంచక్కా ‘బింగ్‌’లోనే వాడేయొచ్చు!

ఇంటర్నెట్‌ డెస్క్‌: టెక్నాలజీ ప్రపంచంలో గత కొన్ని రోజులుగా ఎక్కువగా వినిపిస్తున్న పేరు ChatGPT. ఆర్టిఫిషియల్‌ ఇంటెలిజెన్స్‌ (Artificial Intelligence) తో పని చేసే ఈ టూల్‌.. యూజర్లకు తక్కువ సమయంలో కచ్చితమైన, అవసరమైన సమాచారం ఇస్తుందని ఆ టూల్‌ను కనిపెట్టిన ఓపెన్‌ ఏఐ (Open AI) చెబుతోంది. దీంతో ప్రముఖ సెర్చ్‌ ఇంజిన్ల పని ఇక అయిపోయింది అంటూ వార్తలూ వచ్చాయి. ఈ నేపథ్యంలో సెర్చ్‌ ఇంజిన్లు కూడా ఆ దిశగా అడుగులేస్తున్నాయి. మొన్నటికి మొన్న గూగుల్‌ ‘బార్డ్‌’ (Google Bard) ని అనౌన్స్‌ చేయగా, ఇప్పుడు మైక్రోసాఫ్ట్‌ ఏకంగా ఈ సర్వీసులను లైవ్‌లోకి తీసుకొచ్చింది.

మైక్రోసాఫ్ట్‌ సెర్చ్‌ ఇంజిన్‌ అయిన బింగ్‌లో ఛాట్‌జీపీటీ తరహా సేవలు అందుబాటులోకి తీసుకొచ్చింది. AI ఆధారిత ఆన్సర్‌ ఇంజిన్‌ ద్వారా ఈ సేవలు అందిస్తామని చెబుతోంది. యూజర్లందరికీ యాక్సెస్‌లోకి వచ్చింది అని చెబుతున్నా.. ప్రస్తుతానికి ‘వెయిట్‌ లిస్ట్‌’ ప్రాసెస్‌లో సేవలు అందిస్తోంది. అంటే ఈ సేవలను యాక్సెస్‌ చేయాలనుకునేవారు తొలుత వెయిట్‌ లిస్ట్‌లోకి చేరాలి. ఆ తర్వాత మీ విడత వచ్చినప్పుడు మైక్రోసాఫ్ట్‌ నుంచి సమాచారం వస్తుంది. అప్పుడు డెస్క్‌టాప్‌లో ఈ సేవలు పొందొచ్చు. మొబైల్‌లో ఎప్పటి నుంచి ఈ సేవలు ఉంటాయి అనేది ఇంకా టీమ్‌ వెల్లడించలేదు.

వెయిట్‌లిస్ట్‌ ప్రాసెస్‌ ఇలా..

• డెస్క్‌టాప్‌/ ల్యాప్‌టాప్‌లో ఎడ్జ్‌ బ్రౌజర్‌ ఓపెన్‌ చేయండి. 
• అడ్రెస్‌ బార్‌లో bing.com అని సెర్చ్‌ చేయండి. 
• అప్పుడు ఛాట్‌ బాక్స్‌ ఒకటి ఓపెన్‌ అవుతుంది. అందులో ask me anything అని ఉంటుంది. 
• ఆ దిగువన నాలుగు డమ్మీ ప్రశ్నలు కనిపిస్తాయి. దాని దిగువ Try it అని ఉంటుంది. 
• Try it బటన్‌ను క్లిక్‌ చేస్తే.. ఆ పైన ఉన్న ప్రశ్నకు సమాచారం వస్తుంది. అలాగే కుడివైపున ఓ ఛాట్‌ బాక్స్‌ ఓపెన్‌ అవుతుంది. 
• ఛాట్‌ బాక్స్‌ దిగువన Join the waitlist అనే ఆప్షన్‌ వస్తుంది. 
• వెయిట్‌లిస్ట్‌ బటన్‌ను క్లిక్‌ చేస్తే మైక్రోసాఫ్ట్ మెయిల్‌  లాగిన్‌ పేజీ ఓపెన్‌ అవుతుంది. 
• మెయిల్‌ ఐడీ, పాస్‌వర్డ్‌, తదితర వివరాలు ఇస్తే.. మీరు వెయిట్‌ లిస్ట్‌లో ఉన్నారు అని వస్తుంది. 
• వెయిట్‌ లిస్ట్‌లో ఉన్నవారికి ఈ సౌకర్యం అందుబాటులోకి వచ్చినప్పుడు మెయిల్‌ ద్వారా సమాచారం అందిస్తారు. 

బింగ్‌ ద్వారా అందుబాటులోకి వచ్చే ఛాట్‌ జీపీటీ తరహా సేవలు ఎలా ఉంటాయో చూపించేలా బింగ్‌ ఇప్పటికే కొన్ని ఉదాహరణలు, వాటి సమాధానాలు చూపిస్తోంది. ఇంచుమించు ఛాట్‌ జీపీటీ తరహాలోనే ఆ సమాధానాలు కనిపిస్తున్నాయి. పూర్తిగా అందుబాటులోకి వచ్చాక దీని పూర్తి ఫీచర్లు తెలుస్తాయి.