CNG Price: మళ్లీ పెరిగిన సీఎన్‌జీ ధర.. రెండు నెలల్లో 13వ సారి!

దిల్లీ: సీఎన్‌జీ ధర మరింత పెరిగింది. దేశ రాజధాని దిల్లీలో శనివారం కిలోకు సీఎన్‌జీ ధర రూ.2లు మేర పెరిగింది. గత రెండు నెలల వ్యవధిలోనే సీఎన్‌జీ ధరలు పెంచడం ఇది 13వ సారి కావడం గమనార్హం. దిల్లీ, చుట్టుపక్కల నగరాలకు సీఎన్‌జీ, గొట్టపు వంట గ్యాస్‌ను విక్రయించే ఇంద్రప్రస్థ గ్యాస్‌ లిమిటెడ్‌ వెబ్‌సైట్‌లో పేర్కొన్న వివరాల ప్రకారం.. తాజా పెరుగుదలతో దేశ రాజధాని ప్రాంతంలో దీని ధర కేజీ రూ.75.61కి పెరిగింది. మార్చి 7 నుంచి ఇప్పటివరకు మొత్తంగా 13 సార్లు పెంచగా.. కిలో సీఎన్‌జీపై మొత్తంగా రూ.19.60లు పెరిగింది. గత ఏడాది కాలంగా పరిశీలిస్తే కిలో సీఎన్‌జీపై దాదాపు రూ.32.21 లేదా 60శాతం పెరిగినట్టు గణాంకాలు పేర్కొంటున్నాయి.