NPS rule change: ఎన్‌పీఎస్‌ చెల్లింపుల్లో కీలక మార్పు

NPS rule change: జాతీయ పింఛను పథకం (NPS) చెల్లింపు విధానంలో ‘పెన్షన్‌ ఫండ్‌ రెగ్యులేటరీ అండ్‌ డెవలప్‌మెంట్‌ అథారిటీ (PFRDA)’ కీలక మార్పులు చేసింది. ఎన్‌పీఎస్‌ టైర్‌-2 ఖాతాకు నెలనెలా చేసే చెల్లింపులను క్రెడిట్‌ కార్డు ద్వారా స్వీకరించబోమని స్పష్టం చేసింది. ఈ మేరకు గురువారం ఉత్తర్వులు జారీ చేసింది. అయితే, ఈ కొత్త నిబంధన ఎన్‌పీఎస్‌ టైర్‌-1 ఖాతాలకు వర్తించదని తెలిపింది.

ఎన్‌పీఎస్‌ టైర్‌-2 ఖాతా కొత్తగా తెరిచే వారి నుంచి కూడా క్రెడిట్‌ కార్డు ద్వారా చేసే చెల్లింపులను స్వీకరించబోయేది లేదని పీఎఫ్‌ఆర్‌డీఏ స్పష్టం చేసింది. ఈ నేపథ్యంలో ‘పాయింట్‌ ఆఫ్‌ పర్చేజ్‌’లో ఎక్కడా ఎన్‌పీఎస్‌ టైర్‌-2 చెల్లింపుల్ని క్రెడిట్‌ కార్డు ద్వారా స్వీకరించొద్దని ఆదేశించింది. ఈ కొత్త నిబంధన తక్షణమే అమల్లోకి వస్తుందని తెలిపింది. సాధారణంగా మ్యూచువల్ ఫండ్‌లు లేదా స్టాక్‌లలో పెట్టుబడి కోసం క్రెడిట్ కార్డ్ చెల్లింపులను సంస్థలు ప్రోత్సహించవు. ఎందుకంటే అటువంటి చెల్లింపుల్లో అధిక వడ్డీతో కూడిన డబ్బును పరపతిగా ఉపయోగించాల్సి ఉంటుంది. ఉదాహరణకు ఎన్‌పీఎస్‌ ఖాతాదారులు క్రెడిట్ కార్డు ద్వారా చెల్లిస్తే 0.60 శాతం పేమెంట్‌ గేట్‌వే ఛార్జీ భరించాల్సి ఉంటుంది. దీనికి జీఎస్టీ కూడా తోడైతే అది మరింత అధికమవుతుంది.

టైర్‌-2 ఎన్‌పీఎస్‌ ఖాతా తెరవడం స్వచ్ఛందం. టైర్‌-1 ఖాతా ఉన్నవారే దీనికి అర్హులు. అయితే, టైర్‌-2 ఖాతాలో చేసే పెట్టుబడులకు ఆదాయ పన్ను ప్రయోజనాలు వర్తించవు. పైగా ఈ ఖాతా నుంచి కావాల్సినప్పుడు నిష్క్రమించవచ్చు. అదే టైర్‌-1 ఖాతాకు నిర్దేశిత కాలం పాటు లాకిన్‌ పీరియడ్‌ ఉంటుంది. రూ.1000 కనీస మొత్తంతో ఎన్‌పీఎస్‌ టైర్‌-2 ఖాతా తెరిచే అవకాశం ఉంది.