CAD: పెరిగిన కరెంట్‌ ఖాతా లోటు.. జీడీపీలో 2.8 శాతానికి!

ముంబయి: దేశంలో కరెంట్‌ ఖాతా లోటు (CAD) పెరిగింది. ప్రస్తుత ఆర్థిక సంవత్సరం తొలి త్రైమాసికంలో స్థూల దేశీయోత్పత్తిలో కరెంట్‌ ఖాతా లోటు 2.8 శాతానికి (23.9 బిలియన్‌ డాలర్లు) చేరింది. దిగుమతులు భారీగా పెరగడంతో కరెంట్‌ ఖాతా లోటు పెరిగింది. ఈ మేరకు ఆర్‌బీఐ గురువారం డేటాను విడుదల చేసింది. 2022-23 ఆర్థిక సంవత్సరం ఏప్రిల్‌-జూన్‌ త్రైమాసికంలో కరెంట్‌ ఖాతా లోటు 23.9 బిలియన్‌ డాలర్లుగా నమోదైందని ఆర్‌బీఐ పేర్కొంది. గతేడాది ఇదే త్రైమాసికంలో కరెంట్‌ ఖాతా లోటు 13.4 బిలియన్‌ డాలర్లుగా ఉంది. జీడీపీలో దాని వాటా 1.5 శాతంగా నమోదైంది.

కరెంట్‌ ఖాతా మిగులు 6.6 బిలియన్‌ డాలర్లుగా ఉందని, జీడీపీలో దీని వాటా 0.9 శాతంగా ఉందని ఆర్‌బీఐ డేటా పేర్కొంది. గతేడాది చివరి త్రైమాసికంలో 54.5 బిలియన్‌ డాలర్లుగా ఉన్న మర్చండైజ్‌ వాణిజ్య లోటు 68.5 బిలియన్లకు పెరిగిందని ఆర్‌బీఐ తెలిపింది. ఆదాయానికంటే చెల్లింపులు అధికంగా చెయ్యడం వల్ల కరెంట్‌ ఖాతా లోటు పెరిగిందని ఆర్‌బీఐ పేర్కొంది.