Go first: టికెట్ల విక్రయాలు ఆపండి.. గోఫస్ట్‌కు DGCA ఆదేశం

దిల్లీ: ఆర్థిక కష్టాలతో దివాలా పిటిషన్‌ దాఖలు చేసిన గోఫస్ట్‌ విమానయాన సంస్థకు (Go First) డైరెక్టర్‌ జనరల్‌ ఆఫ్‌ సివిల్‌ ఏవియేషన్‌ (DGCA) షాకిచ్చింది. తక్షణమే టికెట్ల బుకింగ్స్‌ను నిలిపివేయాలని ఆదేశించింది. ప్రత్యక్షంగానూ, పరోక్షంగానూ ఎలాంటి టికెట్ల విక్రయాలూ చేపట్టరాదని ఆదేశించిందని సంబంధిత వర్గాలు తెలిపాయి. మరోవైపు గోఫస్ట్‌ సంస్థకు డీజీసీఏ మరోసారి షోకాజ్‌ నోటీసులు జారీ చేసింది. కార్యకలాపాలు సురక్షితంగా, నమ్మకంగా, సమర్థంగా నడపడంలో విఫలమైనందుకు 1937 ఎయిర్‌క్రాఫ్ట్‌ రూల్స్‌ను అనుసరించి ఎందుకు చర్యలు తీసుకోకూడదో తెలపాలని అందులో పేర్కొంది.

ప్రాట్‌ అండ్‌ విట్నీ సంస్థ సకాలంలో ఇంజిన్లను సరఫరా చేయకపోవడంతో ఆర్థిక ఇబ్బందులు ఎదురయ్యాయని పేర్కొంటూ ఇటీవల గోఫస్ట్‌ సంస్థ దివాలా పిటిషన్‌ను దాఖలు చేసింది. తొలుత మే 3, 4, 5 తేదీల్లో మూడు రోజుల పాటు విమానాలను నిలిపివేసింది. తర్వాత మే 12వ తేదీ వరకు విమానాలను రద్దు చేస్తున్నట్లు ప్రకటించింది. అలాగే, మే 15 వరకు విమాన టికెట్ల విక్రయాలను సైతం నిలిపివేస్తున్నట్లు ప్రకటించింది. ఈ నేపథ్యంలో తదుపరి ఆదేశాలు ఇచ్చే వరకు టికెట్లను విక్రయించొద్దని డీజీసీఏ ఆదేశించింది. తక్షణమే తమ ఆదేశాలను అమలు చేయాలని సూచించింది.

త్వరగా నిర్ణయం తీసుకోండి..

మరోవైపు తాము దాఖలు చేసిన స్వచ్ఛంద దివాలా పరిష్కార పిటిషన్‌పై త్వరితగతిన నిర్ణయం తీసుకోవాలని గోఫస్ట్‌ సంస్థ ఎన్‌సీఎల్‌టీని కోరింది. గోఫస్ట్‌ దాఖలు చేసిన పిటిషన్‌పై మే 4న విచారణ జరిపిన ఎన్‌సీఎల్‌టీ దిల్లీ బెంచ్‌ తన తీర్పును రిజర్వ్‌ చేసింది. విమాన లీజుదారులు తమ విమానాలను డీరీజిస్టర్‌ చేయిస్తున్నందున త్వరగా నిర్ణయాన్ని వెలువరించాలని గోఫస్ట్‌ తరఫు న్యాయవాది బెంచ్‌ దృష్టికి తీసుకెళ్లారు. దీంతో గోఫస్ట్‌ విజ్ఞప్తిని బెంచ్‌ అంగీకరించింది.