Air India: ఎయిరిండియా సీఈఓకు డీజీసీఏ షోకాజ్‌ నోటీసులు

దిల్లీ: ఎయిరిండియా (Air India) విమానంలో ఓ పైలట్‌ తన స్నేహితురాలిని కాక్‌పిట్‌లోకి ఆహ్వానించిన ఘటనను పౌర విమానయాన నియంత్రణ సంస్థ (DGCA) సీరియస్‌గా తీసుకుంది. ఈ అంశాన్ని నివేదించడంలో జాప్యం జరిగిందంటూ ఎయిరిండియా సీఈఓ క్యాంబెల్‌ విల్సన్‌కు షోకాజ్‌ నోటీసులు జారీ చేసింది.

ఎయిరిండియా (Air India) భద్రత, రక్షణ- నాణ్యత విభాగాధిపతికి సైతం నోటీసులు జారీ చేసినట్లు డీజీసీఏ ఉన్నతాధికారి ఒకరు తెలిపారు. ఏప్రిల్‌ 21నే వారికి నోటీసులు జారీ అయినట్లు వెల్లడించారు. సకాలంలో సంఘటనను నివేదించదలేదని.. ఇది డీజీసీఏ (DGCA) భద్రతా నిబంధనలకు విరుద్ధమని పేర్కొన్నారు. అలాగే ఈ ఘటనపై విచారణ జరపడంలోనూ జాప్యం చోటుచేసుకుందని తెలిపారు. దీనిపై 15 రోజుల్లోగా సమాధానం ఇవ్వాలని నోటీసుల్లో ఆదేశించినట్లు వెల్లడించారు. నోటీసులపై ఇప్పటి వరకు ఎయిరిండియా నుంచి ఎలాంటి సమాచారం లేదు.

ఇదీ జరిగిన ఘటన...

ఎయిరిండియా (Air India) విమానంలో ఓ పైలట్‌ తన స్నేహితురాలిని కాక్‌పిట్‌లోకి తీసుకెళ్లడమే గాక.. ప్రయాణ సమయమంతా ఆమెను అక్కడే కూర్చోబెట్టుకున్నాడు. ఫిబ్రవరి 27న దుబాయ్‌ నుంచి దిల్లీ వచ్చిన ఎయిరిండియా (Air India) విమానంలో ఈ సంఘటన చోటుచేసుకుంది. ప్రయాణికుల్లో తన స్నేహితురాలు ఉండడంతో పైలట్‌ అత్యుత్సాహం ప్రదర్శించాడు. విమానం గాల్లోకి ఎగిరిన కొద్దిసేపటికే ఆమెను కాక్‌పిట్‌లోకి ఆహ్వానించాడు. దిల్లీ చేరుకునేంతవరకు అంటే.. దాదాపు 3 గంటలపాటు ఆ మహిళ కాక్‌పిట్‌లోనే ఫస్ట్‌ అబ్జర్వర్‌ సీట్‌లో కూర్చున్నట్లు అధికారులు తెలిపారు. ఈ ఘటనపై క్యాబిన్‌ సభ్యుల్లో ఒకరు డీజీసీఏకు ఫిర్యాదు చేయడంతో విషయం బయటపడింది. తన స్నేహితురాలికి కాక్‌పిట్‌లోనే భోజనం అందజేయాలని, సకల మర్యాదలు చేయాలని విమాన సిబ్బందిని పైలట్‌ ఆదేశించినట్లు సమాచారం. ఇందుకు అభ్యంతరం తెలిపిన సిబ్బందితో పైలట్‌ దురుసుగా ప్రవర్తించినట్లు ఆ ఫిర్యాదులో పేర్కొన్నట్లు తెలిసింది. మరోవైపు, ఈ వ్యవహారంపై దర్యాప్తు చేస్తున్నట్లు డీజీసీఏ తెలిపింది.