IRCTC: ఒకే టికెట్‌తో 56 రోజుల ప్రయాణం.. దీని గురించి తెలుసా?

Indian Railways: ఇండియన్‌ రైల్వే అందిస్తున్న ‘సర్క్యులర్‌ జర్నీ’ టికెట్ల గురించి తెలుసా..? తక్కువ ధరతో ప్రయాణించేందుకు తీసుకొచ్చిన ఈ టికెట్ల గురించి మరిన్ని విషయాలు తెలుసుకోండి..

Published : 05 Sep 2023 11:07 IST

ఇంటర్నెట్‌డెస్క్‌: నిత్యం లక్షల సంఖ్యలో ప్రజలు తమ గమ్యస్థానాన్ని చేరుకోవటానికి రైలు ప్రయాణాన్ని ఎంచుకుంటారు. తక్కువ ఖర్చుతో ప్రయాణం సాగడం అందుకు ఒక కారణం. అయితే పుణ్యస్థలాలు, ఉద్యోగం, వ్యాపారం అంటూ నెలలో వందల మైళ్ల దూరం ప్రయాణించే వారూ ఉంటారు. అలాంటి వారికి ప్రయోజనం చేకూర్చేందుకు ఇండియన్‌ రైల్వే (Indian Railways) ప్రత్యేకమైన టికెట్లను అందిస్తోంది. ‘సర్క్యులర్‌ జర్నీ టికెట్‌’ (Circular Journey Ticket) పేరుతో అందుబాటులోకి తెచ్చిన ఈ టికెట్‌ ద్వారా.. తక్కువ ఖర్చుతో ఎక్కువ దూరం ప్రయాణం చేయొచ్చు. సాధారణంగా కొనుగోలు చేసే టికెట్లతో పోలిస్తే వీటిలో అనేక ప్రయోజనాలు ఉన్నాయి. అవేంటో చూసేయండి..

ఇండియన్‌ రైల్వే తీసుకొచ్చిన ఈ సర్క్యులర్‌ జర్నీ టికెట్ల గురించి చాలా మందికి అవగాహన లేదు. సాధారణ ప్రయాణ టికెట్ల ధర కంటే ఈ సర్క్యులర్‌ జర్నీ టికెట్ల ధరలు తక్కువగా ఉంటాయి. మీ ప్రయాణానికి అనుకూలంగా ఏ క్లాసునైనా ఎంచుకొనే అవకాశం ఉంటుంది. మీ ప్రయాణాన్ని మొదలుపెట్టిన చోటుకు తిరిగి చేరుకునే వరకు ఈ టికెట్‌ వ్యాలిడిటీ ఉంటుంది. అంతే కాకుండా సర్క్యులర్‌ ప్రయాణ టికెట్‌పై గరిష్ఠంగా 8 బ్రేక్ జర్నీలు (Break Journey) ఉంటాయి. అంటే ఎంపిక చేసుకున్న ఎనిమిది స్టేషన్లలో దిగవచ్చు. కొద్ది రోజులు ఆ ప్రదేశాన్ని సందర్శించిన తర్వాత తిరిగి ప్రయాణాన్ని ప్రారంభించొచ్చు. ఇలా గరిష్ఠంగా 56 రోజుల పాటు ఒకే టికెట్‌తో ప్రయాణం కొనసాగించొచ్చు.

ఉదాహరణకు.. హైదరాబాద్‌ నుంచి తిరుపతి, బెంగళూరు చుట్టి రావడానికి టికెట్ కొనుగోలు చేశారనుకుందాం. అప్పుడు హైదరాబాద్‌ నుంచి ప్రారంభమై మంత్రాలయం రోడ్డు- తిరుపతి- బెంగళూరు సిటీ- చెన్నై సెంట్రల్‌ - భద్రాచలం మీదుగా మళ్లీ హైదరాబాద్‌ చేరుకోవడంతో ఈ జర్నీ ముగుస్తుంది. మొత్తం 8 స్టేషన్లను ఎంచుకోవచ్చు. ఆ స్టేషన్లలో దిగి ఆయా ప్రాంతాలను సందర్శించి అక్కడి నుంచే తిరిగి ప్రయాణాన్ని కొనసాగించవచ్చు. ఇలా గరిష్ఠంగా 56 రోజుల పాటు ఒకే టికెట్‌తో చుట్టిరావచ్చు. ముఖ్యంగా విహార యాత్రలకు వెళ్లే వారికి ఇది బాగా ఉపయోగపడుతుంది.

ఎలా బుక్‌ చేసుకోవాలి?

  • ఈ సర్క్యులర్‌ టికెట్ల కోసం రైల్వే డివిజన్‌ కమర్షియల్‌ మేనేజర్‌ని సంప్రదించాలి.
  • వారు మీ ప్రయాణ ప్రణాళిక ఆధారంగా టికెట్‌ ధరను లెక్కిస్తారు. టికెట్‌ విషయాన్ని స్టేషన్‌ మేనేజర్‌కు తెలియజేస్తారు.
  • అలా మీ ప్రయాణాన్ని ప్రారంభించే స్టేషన్‌ బుకింగ్‌ కార్యాలయంలో సర్క్యులర్‌ టికెట్‌ కొనుగోలు చేయవచ్చు. అలాగే మీ బ్రేక్‌ స్టేషన్లను కూడా ఎంచుకోవచ్చు.
  • ఇక ప్రయాణం కోసం రిజర్వ్ చేసిన ప్రయాణ టికెట్‌ను జారీ చేస్తారు.

ఎలా లెక్కిస్తారంటే..?

టికెట్ చెల్లుబాటు వ్యవధి, ప్రయాణ రోజులు, విరామ ప్రయాణ రోజులన్నింటినీ పరిగణనలోకి తీసుకొని లెక్కిస్తారు. ప్రయాణ రోజులు.. 400 కిలోమీటర్ల దూరానికి 1 రోజుగా, అలాగే ప్రయాణం చేయని రోజుల్లో 200 కిలోమీటర్లుగా ఒక రోజును లెక్కిస్తారు. అయితే ఈ సర్క్యులర్‌ టికెట్‌పై ప్రయాణికుడి సంతకం ఉండాలి. కనిష్ఠంగా 1,000 కిలోమీటర్ల దూరం ప్రయాణిస్తే సర్క్యులర్‌ జర్నీ టికెట్ల ధరపై సీనియర్‌ సిటిజన్లకు రాయితీ ఇస్తారు. పురుషులకైతే 40 శాతం, మహిళలకైతే 50 శాతం రాయితీ ఉంటుంది. విడిగా బుక్ చేసుకున్న వ్యక్తిగత టికెట్ల మొత్తం ధర కంటే సర్క్యులర్‌ జర్నీ టికెట్ చౌకగా ఉంటుంది. పదే పదే టికెట్లు తీయాల్సిన అవసరం లేకండా జర్నీ చేయడానికి ఈ సర్క్యులర్‌ టికెట్లు ఉపయోగపడతాయి.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.

మరిన్ని