Diney+ Hotstar: డిస్నీ+ హాట్‌స్టార్‌ సేవల్లో అంతరాయం.. క్రికెట్‌ ఫ్యాన్స్‌ ఆగ్రహం

ఇంటర్నెట్‌ డెస్క్‌: ప్రముఖ స్ట్రీమింగ్‌ సంస్థ డిస్నీ+ హాట్‌స్టార్‌ (Diney+ Hotstar) సేవల్లో అంతరాయం ఏర్పడింది. హాట్‌స్టార్‌ యాప్‌, వెబ్‌సైట్‌ ఓపెన్‌ చేస్తుంటే.. ఎర్రర్‌ వస్తోందంటూ యూజర్లు ఫిర్యాదు చేశారు. దిల్లీలో భారత్‌- ఆస్ట్రేలియా మధ్య రెండో టెస్టు జరుగుతున్న వేళ ఈ అంతరాయం నెలకొనడంపై క్రికెట్‌ అభిమానులు ఆగ్రహం వ్యక్తంచేశారు. దీంతో పలువురు సోషల్‌ మీడియాలో పోస్టులు పెట్టారు. మధ్యాహ్నం 2.30 గంటల సమయానికి సేవలు యథావిధిగా అందుబాటులోకి వచ్చాయి.

డిస్నీ+ హాట్‌స్టార్‌ సేవల్లో దేశవ్యాప్తంగా ఈ అంతరాయం ఏర్పడినట్లు సమాచారం. ఉదయం 11.30 నుంచి సేవల్లో అవాంతరాలు ఎదుర్కొన్నట్లు యూజర్ల ఫిర్యాదుల ద్వారా తెలుస్తోంది. దిల్లీ, జైపుర్‌, కోల్‌కతా, నాగ్‌పూర్‌, హైదరాబాద్‌, ముంబయి, చండీగఢ్‌ నుంచి ఎక్కువగా ఫిర్యాదులు వచ్చినట్లు డౌన్‌ డిటెక్టర్‌ వెబ్‌సైట్‌ పేర్కొంది. తనకూ ఈ అంతరాయం ఏర్పడినట్లు మాజీ క్రికెటర్‌ అభినవ్‌ ముకుంద్‌ ట్వీట్‌ చేశారు. యూజర్లకు కలిగిన అసౌకర్యంపై హాట్‌స్టార్‌ స్పందించలేదు. ఏ కారణం చేత అవాంతరం తలెత్తిందీ వెల్లడించలేదు.