Investments: బంగారం, స్థిరాస్తిలో ఎక్కువగా పెట్టుబడులు పెడుతున్నారా?
మీ పెట్టుబడులు తిరిగి అధిక లాభాలు వచ్చే విధంగా ఉండటంతో పాటు లిక్విడిటీ, పన్ను మినహాయింపులు కలిగి ఉండే విధంగా చూసుకోవాలి.
ఇంటర్నెట్ డెస్క్: మొట్ట మొదటి ఇల్లు కొనుగోలు చేయడం.. నచ్చిన ఆభరణాలను కొనుగోలు చేయడం వంటివి భావోద్వేగాలకు సంబంధించిన విషయం. మదుపు చేసేటప్పుడు కొన్నిసార్లు రాబడి, రిస్క్, లిక్విడిటీ, పన్ను వంటివి పరిగణనలోకి తీసుకోకుండా భావోద్వేగాలతో నిర్ణయాలు తీసుకుంటారు. ఇతర అంశాలను అంతగా పట్టించుకోరు. బంగారం, స్థిరాస్తిలో పెట్టుబడులు ఎప్పటికీ మంచివే అనే ఒక నమ్మకంతో ఉంటారు. అందుకే ఈ పెట్టుబడులపై ఎక్కువ ఆసక్తి కనబరుస్తుంటారు. కానీ ఇవి కొంత రిస్క్తో కూడుకొని ఉంటాయి. ఇందులో స్థిరమైన రాబడి ఉండకపోవచ్చు. లిక్విడిటీ సమస్యలు కూడా ఉంటాయి. అలాగని ఈ పెట్టుబడులకు పూర్తిగా దూరంగా ఉండాలని చెప్పడం ఇక్కడి ఉద్దేశం కాదు. కానీ, ఎక్కువ మొత్తంలో వాటికే కేటాయించకుండా పెట్టుబడులను సమతుల్యం చేసుకుంటే మంచిదని ఆర్థిక నిపుణుల అభిప్రాయం.
బంగారం, స్థిరాస్తులు: బంగారం ద్రవ్యోల్బణానికి అనుగుణంగా ఉంటుంది గానీ దీనిపై ఎలాంటి డివిడెండ్ లేదా వడ్డీ లభించదు. అంతర్జాతీయంగా కమొడిటీ, చమురు, డాలర్పై ఆధారపడి వీటి ధరలు మారుతుంటాయి. వీటిని సాధారణ పెట్టుబడుదారులు అంతగా పట్టించుకోరు. స్థిరాస్తి పెట్టుబడుల్లో లిక్విడిటీ సమస్యలు, లావాదేవీలు, రుసుములు అధికంగా ఉంటాయి. దీంతోపాటు రిజిస్ర్టేషన్, ఆక్రమణలు వంటి సమస్యలు ఉంటాయి. అయితే, ఈ పెట్టుబడులపై వచ్చే రాబడిని కూడా పరిగణనలోకి తీసుకోవాల్సి ఉంటుంది. స్థిరాస్తి పెట్టుబడులపై దీర్ఘకాలిక రాబడి, మార్కెట్లలో వచ్చే రాబడి కంటే తక్కువగా ఉండే అవకాశం ఉంది. బంగారం పెట్టుబడులను కూడా ఇదేవిధంగా చూడొచ్చు. బంగారంతో పోలిస్తే స్థిరాస్తి పెట్టుబడులపై కొంత ఎక్కువ రాబడి వచ్చే అవకాశం ఉంటుంది.
రిస్క్: ఆభరణాల రూపంలో బంగారాన్ని కొనుగోలు చేసేందుకు ఎక్కువ ఆసక్తి చూపుతారు. కానీ, అమ్మేందుకు వెనకాడుతారు. బంగారం, స్థిరాస్తి ఉంటే ఎప్పటికైనా మంచిదే అని భావిస్తారు. దీంతో కేవలం పెట్టుబడులు పెట్టి వదిలేయడంతో రాబడి ఎక్కువగా ఉండదు. ఇది పెట్టుబడుల ప్రణాళికకు పూర్తి విరుద్ధం అని చెప్పుకోవాలి.
పెట్టుబడుల వైవిధ్యత: ఈ రకమైన పెట్టుబడులతో ఆర్థిక లక్ష్యాలు కూడా దెబ్బతినే అవకాశం ఉంది. పెద్ద మొత్తంలో బంగారం, స్థిరాస్తిపై పెట్టుబడి పెట్టడం వల్ల ఇతర పెట్టుబడులకు తగినంత మొత్తం కేటాయించలేకపోవచ్చు. పిల్లల చదువు, వివాహం, పదవీ విరమణ వంటి లక్ష్యాలు దెబ్బతినే అవకాశం ఉంది. అవి పెట్టుబడుల ప్రణాళికలో ఉండే చాలా ముఖ్యమైన అంశాలు. దీంతోపాటు అత్యవసర సమయాల్లో ఈ పెట్టుబడులు ఉపయోగపడవు.
పోర్ట్ఫోలియోలో ఎంత శాతం ఈ పెట్టుబడులు ఉండొచ్చు..?
మీ పోర్ట్ఫోలియోలో ఈ పెట్టుబడులు ఎన్ని ఉన్నాయో ఒకసారి చూసుకోండి. రిస్క్, ఆర్థిక లక్ష్యాల ఆధారంగా పెట్టుబడులు పెట్టాలి. బంగారం, స్థిరాస్తి పెట్టుబడులను పరిమితం చేయాలి. మిగిలిన లక్ష్యాలకు ప్రాధాన్యం ఇవ్వాలి. ముఖ్యంగా జీవిత, ఆరోగ్య బీమాలను ఆర్థిక ప్రణాళికలో భాగం చేయాలి. పోర్ట్ఫోలియోలో స్థిరాస్తి పెట్టుబడులకు చివరి స్థానం కల్పించాలి. స్థిరాస్తి కొనుగోలుతో పాటు నిర్వహణ, విక్రయం కూడా కష్టంగానే ఉంటుంది. ఇందులో లిక్విడిటీ ఉండదు. లావాదేవీల వ్యయాలు, పన్ను వంటివి రాబడిని తగ్గిస్తాయి. పైగా కొంత మొత్తం మాత్రమే అవసరం అయినప్పుడు పూర్తి ఇంటిని/స్థలాన్ని అమ్మాల్సి రావచ్చు. దానికి కూడా సమయం పడుతుంది. ద్రవ్యోల్బణానికి మించి రాబడి ఇస్తుంది కాబట్టి బంగారం కోసం కొంత కేటాయించాలి. పోర్ట్ఫోలియోలో 20 నుంచి 40 శాతం స్థిరాస్తి పెట్టుబడులకు, 5 నుంచి 10 శాతానికి మించకుండా పసిడి పెట్టుబడులకు కేటాయించాలనేది నిపుణుల సూచన.
బంగారంలో మదుపు చేయాలనుకునేవారు ఈటీఎఫ్, సార్వభౌమ పసిడి బాండ్లను పరిశీలించడం మంచిది. వీటిల్లో బంగారం తరుగుదల ఉండదు. అలాగే భద్రత గురించి ఆందోళన పడాల్సిన అవసరం ఉండదు. అదేవిధంగా బాండ్లు, ఈటీఎఫ్ల ద్వారా బంగారం పెట్టుబడులపై పన్ను తక్కువగా ఉంటుంది. మీ పోర్ట్ఫోలియోలో ఎక్కువగా స్థిరాస్తి, బంగారం పెట్టుబడులు ఉన్నట్లయితే వాటిని సరిచూసుకోండి. రెండో ఇల్లు కొనుగోలు చేయడం లేదా బంగారం కొనుగోలు చేయడం ఆర్థికంగా ధైర్యాన్ని ఇస్తుంది గానీ దానిపై తగినంత రాబడి ఉండకపోవచ్చన్న విషయం గుర్తుంచుకోండి. రుణాలు అందుబాటులో ఉన్నాయని రెండో ఇల్లు కొంటే ఇతర లక్ష్యాలకు పెట్టుబడులు పెట్టడం కష్టతరం అవుతుంది.
Trending
గమనిక: ఈనాడు.నెట్లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.
మరిన్ని
తాజా వార్తలు (Latest News)
-
Sunetra Pawar: ఎన్నికల వేళ.. రూ.25 వేల కోట్ల స్కామ్ కేసులో సునేత్ర పవార్కు క్లీన్ చిట్
-
గగనతలంలో ‘అమ్మ’కు సర్ప్రైజ్.. బుడతడి ఐడియా అదుర్స్
-
అవనిగడ్డలో వైకాపా ర్యాలీ.. బాణసంచా పడి తెదేపా కార్యకర్త ఇల్లు దగ్ధం
-
టేకాఫ్ సమయంలో ఊడిన బోయింగ్ విమానం టైరు
-
సొంత అభ్యర్థికి వ్యతిరేకంగా ‘కాంగ్రెస్’ ప్రచారం.. ఎందుకంటే!
-
రెజ్యూమె రూపొందించడంలో ఈ తప్పులొద్దు.. గూగుల్ మాజీ రిక్రూటర్ టిప్స్