5G Network: విమానాశ్రయాల్లో హైఫ్రీక్వెన్సీ 5జీ సేవలకు DOT నో!

దిల్లీ: దేశవ్యాప్తంగా 5జీ సేవలు ఇప్పటికే పలు నగరాల్లో, కొన్ని విమానాశ్రయాల్లో అందుబాటులోకి వచ్చాయి. భవిష్యత్తులో దేశంలోని అన్ని ప్రాంతాలకు విస్తరించనున్నట్లు టెలికాం సంస్థలు ప్రకటించాయి. ఈ నేపథ్యంలో కేంద్ర టెలికాం విభాగం మొబైల్‌ నెట్‌వర్క్‌ సంస్థలకు కీలక సూచన చేసింది. విమానాశ్రయాలు, పరిసర ప్రాంతాల్లో హైఫ్రీక్వెన్సీ 5జీ సేవలను నిలిపివేయాలని సూచించింది. డైరెక్టరేట్ జనరల్‌ ఆఫ్‌ సివిల్‌ ఏవియేషన్‌ (DGCA) అభ్యర్థన మేరకు ఈ నిర్ణయం తీసుకున్నట్లు తెలిపింది. 3.3-3.6 గిగాహెర్జ్‌ సామర్థ్యం కలిగిన 5జీ నెట్‌వర్క్‌ సేవలను విమానాశ్రయానికి రెండు కిలోమీటర్ల పరిధి వరకు నిలిపివేయాలని ఆదేశించింది. ఈ నిబంధన తక్షణం అమల్లోకి వస్తుందని తెలిపింది.

ప్రస్తుతం ఎయిర్‌టెల్ సంస్థ మాత్రమే పట్నా, బెంగళూరు, పుణే, వారణాశి, నాగ్‌పూర్‌ నగరాల్లోని విమానాశ్రయాల్లో 5జీ సేవలను అందిస్తోంది. తాజా నిర్ణయంతో ఈ సేవలు నిలిచిపోనున్నాయి. విమానశ్రయ పరిసర ప్రాంతాల్లో 5జీ సిగ్నల్స్‌ పైలట్‌ విమానం ఎత్తును నియత్రించే అల్టీమీటర్‌ అనే పరికరం సిగ్నల్స్‌ను అడ్డుకుంటున్న కారణంగా డీజీసీఏ టెలికాం విభాగానికి ఈ సూచన చేసింది. అయితే, ఈ నిబంధన తాత్కాలికమేనని, అల్టీమీటర్‌కు ప్రత్యామ్నాయంగా మరో వ్యవస్థను ఏర్పాటు చేసిన అనంతరం 5జీ సేవలకు అనుమతి లభిస్తుందని తెలిపింది.  ఇది ఎప్పటిలోగా సాధ్యపడుతుందనే దానిపై స్పష్టతనివ్వలేదు.