Ducati: ద్విచక్ర వాహన ధరలు పెంచనున్న డుకాటీ

ముంబయి: ఉత్పత్తి వ్యయం పెరుగుతున్న నేపథ్యంలో ప్రముఖ వాహన తయారీ కంపెనీలన్నీ ధరల పెంపు బాట పట్టాయి. తాజాగా ఇటలీకి చెందిన సూపర్‌బైక్‌ల సంస్థ డుకాటీ (DUCATI) కూడా తన ద్విచక్రవాహనాల ధరలను పెంచనున్నట్టు సోమవారం ప్రకటించింది. జనవరి 1 నుంచి ఈ పెంపు ఉంటుందని తెలిపింది. అయితే, ఎంతమొత్తం పెంచేదీ వెల్లడించలేదు.

పెరిగిన ధరలను కంపెనీ ఇప్పటి వరకు భరిస్తూ వచ్చిందని, ముడిసరకుల ధరలు పెరిగి ఉత్పత్తి వ్యయం మరింత పెరిగిన నేపథ్యంలో పెంపు నిర్ణయం తీసుకోవాల్సి వచ్చిందని పేర్కొంది. దిల్లీ, ముంబయి, పుణె, బెంగళూరు, చెన్నై, కోచి, హైదరాబాద్‌, కోల్‌కతాలో ఉన్న డీలర్‌షిప్‌ల వద్ద అన్ని మోడళ్లపైనా ధరల పెంపు ఉంటుందని తెలిపింది. అంతర్జాతీయంగా తీసుకొచ్చే అన్ని మోడళ్లనూ ఇకపై దేశీయ మార్కెట్‌లో విడుదల చేస్తామని కంపెనీ తెలిపింది.