GST: ‘ఒకే జీఎస్టీ రేటు ఉండాలి’.. ప్రధాని ఈఏసీ ఛైర్మన్‌ సలహా!

ప్రధానమంత్రికి ఆర్థిక సలహా మండలి ఛైర్మన్‌ వివేక్‌ దేబ్రాయ్‌ దేశ పన్నుల వ్యవస్థలో తీసుకురావాల్సిన మార్పులపై పలు కీలక సూచనలు చేశారు. ఒకే జీఎస్టీ రేటుతో పాటు మినహాయింపులు లేని పన్నుల వ్యవస్థను తీసుకురావాల్సిన అవసరం ఉందని సూచించారు.

Updated : 08 Nov 2022 12:33 IST

దిల్లీ: భారత్‌లో ఒకేరకమైన జీఎస్టీ రేటు ఉండాలని ప్రధానమంత్రి ఆర్థిక సలహా మండలి (EAC-PM) ఛైర్మన్‌ వివేక్‌ దేబ్రాయ్‌ అన్నారు. అలాగే మినహాయింపులు లేని పన్ను వ్యవస్థ ఉండాలని తెలిపారు. కేంద్ర, రాష్ట్ర ప్రభుత్వాల పన్నుల వాటా జీడీపీలో కేవలం 15 శాతమేనని తెలిపారు. అదే ప్రజా మౌలిక వసతులపై ప్రభుత్వం చేస్తున్న ఖర్చు చాలా ఎక్కువని పేర్కొన్నారు. ఇవి తన వ్యక్తిగత అభిప్రాయాలు మాత్రమేనని.. వీటిని మండలి ప్రతిపాదనలుగా భావించొద్దని కోరారు.

ఉన్నత వర్గాలు వినియోగించేవిగా భావించే వస్తువులు, నిత్యావసరాలపై విధించే పన్ను రేట్లలో ఉన్న అంతరాన్ని తొలగిస్తే అనేక సంక్లిష్టతలకు పరిష్కారం దొరుకుతుందని దేబ్రాయ్‌ అభిప్రాయపడ్డారు. ఉత్పత్తితో సంబంధం లేకుండా ఒకేరకమైన పన్ను ఉండాలన్నారు. జీఎస్టీ అమల్లోకి రావడానికి ముందు సగటు పన్ను రేటు 17 శాతంగా ఉంటుందని ఆర్థిక వ్యవహారాల విభాగం అంచనా వేసిందని తెలిపారు. కానీ, అది ప్రస్తుతం 11.5 శాతంగా ఉన్నట్లు పేర్కొన్నారు.

మరోవైపు పన్ను మినహాయింపుల వల్ల ప్రభుత్వం జీడీపీలో 5-5.5 శాతం ఆదాయం కోల్పోతోందని తెలిపారు. ఈ నేపథ్యంలో పన్నులు కట్టడం లేదా ప్రభుత్వం నుంచి పొందే సేవలు, వసతుల్ని తగ్గించుకోవడం.. రెండింట్లో ఏదో ఒకదానికి ప్రజలు సిద్ధపడాలన్నారు. పన్ను ఎగవేత చట్టవిరుద్ధమైన నేపథ్యంలో చాలా మంది మినహాయింపు నిబంధనల్లోని లొసుగుల్ని ఆసరా చేసుకొని లబ్ధి పొందుతున్నారని తెలిపారు. ఈ నేపథ్యంలో మినహాయింపులతో కూడిన పన్నుల వ్యవస్థ అవసరమా అని ప్రశ్నించారు. 

కార్పొరేట్‌ పన్ను, వ్యక్తిగత ఆదాయ పన్ను మధ్య ఉన్న కృత్రిమ వ్యత్యాసాన్ని సైతం తొలగించాలని దేబ్రాయ్‌ తెలిపారు. నమోదుకాని సంస్థల్లో చాలా వరకు వ్యక్తిగత హోదాలో ఆదాయ పన్ను చెల్లిస్తున్నాయని పేర్కొన్నారు. అందుకే వ్యత్యాసాన్ని తొలగిస్తే ఎలాంటి ఇబ్బందులూ ఉండవన్నారు.

Read latest Business News and Telugu News

Follow us on Facebook, Twitter, Instagram & Google News.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.


మరిన్ని

ap-districts
ts-districts

ఎక్కువ మంది చదివినవి (Most Read)

మరిన్ని