ED raids against Vivo: దేశవ్యాప్తంగా వివో కార్యాలయాల్లో ఈడీ సోదాలు

ఇంటర్నెట్‌ డెస్క్‌: చైనాకు చెందిన ప్రముఖ మొబైల్‌ తయారీ కంపెనీ వివో (Vivo) సంస్థ కార్యాలయాల్లో ఎన్‌ఫోర్స్‌మెంట్‌ డైరెక్టరేట్‌ (ED) మంగళవారం సోదాలు నిర్వహిస్తోంది. దేశవ్యాప్తంగా వివిధ రాష్ట్రాల్లో 44 చోట్ల వివో, దాని అనుబంధ సంస్థలకు చెందిన కార్యాలయాల్లో ఈ సోదాలు జరుపుతోంది. మనీలాండరింగ్‌ నిరోధక చట్టం ఉల్లంఘించిందన్న ఆరోపణలపై ఈ దాడులు నిర్వహిస్తున్నట్లు తెలుస్తోంది.

ఈడీ దాడులపై వివో తన స్పందన తెలిజేయలేదు. మరోవైపు చైనాకు చెందిన మొబైల్‌ తయారీ కంపెనీలపై ఇప్పటికే కేంద్రం దృష్టి పెట్టింది. ఈ ఏడాది ఏప్రిల్‌లో చైనాకు చెందిన షావోమికి చెందిన ఖాతాలను ఈడీ స్తంభింపజేసింది. అక్రమంగా విదేశాలకు నిధులు మళ్లించిందన్న కారణంతో రూ.5,551.27 కోట్లు నిల్వలు ఉన్న ఖాతాలను సీజ్‌ చేసింది. అంతకుముందు ఒప్పో, వన్‌ప్లస్‌, జడ్‌టీఈ సంస్థల కార్యాలయాలపైనా ఈ సోదాలు జరిగాయి.