Elon Musk: ఉద్యోగితో మరో ఇద్దరు పిల్లలకు జన్మనిచ్చిన మస్క్‌?

వాషింగ్టన్‌: టెస్లా సీఈఓ ఎలాన్‌ మస్క్‌ మరో ఇద్దరు పిల్లలకు తండ్రయినట్లు సమాచారం. తను స్థాపించిన న్యూరాలింక్‌ కంపెనీలో పనిచేస్తున్న శివోన్‌ జిలిస్‌తో కలిసి గత ఏడాది ఆయన కవలలకు జన్మనిచ్చినట్లు బిజినెస్‌ ఇన్‌సైడర్‌ పత్రిక పేర్కొంది. మస్క్‌ ఇప్పటికే తన మాజీ భార్య జస్టిన్‌ విల్సన్‌తో ఐదుగురు పిల్లలకు, కెనడా సింగర్‌ గ్రైమ్స్‌తోనూ ఇద్దరు పిల్లలకు జన్మనిచ్చారు. గత ఏడాది డిసెంబరులోనే మస్క్‌, గ్రైమ్స్‌ కలిసి సరోగసీ ద్వారా తమ రెండో బిడ్డకు ఆహ్వానం పలికారు. ప్రస్తుతం వీరివురు దూరంగా ఉంటున్నట్లు సమాచారం.

మస్క్‌, జిలిస్‌ కలిసి ఏప్రిల్‌ 2022లో తమ పిల్లల పేరు మార్పుపై కోర్టును ఆశ్రయించినట్లు తెలుస్తోంది. తమ పేర్లలోని చివరి పదాన్ని పిల్లల పేర్లలో ఉండేలా మార్చేందుకు అనుమతించాలని కోరినట్లు కోర్టు పత్రాల ద్వారా తెలిసిందని బిజినెస్‌ ఇన్‌సైడర్‌ పేర్కొంది. దీనికి కోర్టు ఆమోదం లభించినట్లు కథనంలో ప్రచురించారు. 

జిలిస్‌ (36) లింక్డిన్‌ ఖాతా ప్రకారం.. ప్రస్తుతం ఆమె న్యూరాలింక్‌లో ‘ఆపరేషన్స్‌ అండ్‌ స్పెషల్‌ ప్రాజెక్ట్స్‌’ డైరెక్టర్‌గా వ్యవహరిస్తున్నారు. మే 2017లో ఆమె కంపెనీలో చేరారు. అదే నెల టెస్లాలో కృత్రిమ మేధ విభాగానికి డైరెక్టర్‌గా ఎంపికయ్యారు. అక్కడ 2019 వరకు పనిచేశారు. మస్క్‌ స్థాపించిన మరో సంస్థ ఓపెన్‌ఏఐలోనూ ఆమె బోర్డు సభ్యురాలిగా ఉన్నారు. ట్విటర్‌ను కొనుగోలు చేసిన మస్క్‌ బహుశా జిలిస్‌నే దానికి సీఈఓగా నియమించే అవకాశం ఉన్నట్లు  ఆ మధ్య వార్తలొచ్చాయి. ఈ వార్తలపై ఇటు మస్క్‌గానీ, అటు జిలిస్‌ ఇంకా స్పందించలేదు.