Elon Musk: మస్క్‌ను మలిచిన మూడు పుస్తకాలు.. బయోగ్రఫీలో వెల్లడించిన ప్రపంచ కుబేరుడు

ఇంటర్నెట్‌ డెస్క్‌: ఎలాన్‌ మస్క్‌.. ఈ పేరు వినగానే ఎవరికైనా టెస్లా విద్యుత్ కార్లు, స్పేస్‌ఎక్స్‌, ట్విటర్‌ (ప్రస్తుతం ఎక్స్), న్యూరాలింక్, ది బోరింగ్‌ కంపెనీ, సోలార్‌ సిటి సంస్థలు గుర్తొస్తాయి. ఇటీవలే ఆయన జీవిత కథ ‘ఎలాన్‌ మస్క్‌ (Elon Musk)’ పేరుతో మార్కెట్లోకి విడుదలైంది. వాల్టర్‌ ఐజాక్సన్ (Walter Isaacson) అనే అమెరికన్ రచయిత దీన్ని రచించారు. దక్షిణాఫ్రికాలో సాధారణ కుటుంబంలో జన్మించిన మస్క్‌ ప్రపంచ కుబేరుడిగా ఎలా ఎదిగారు? జీవితంలో గొప్ప విజయాలు ఎలా సాధించారు? వంటి అంశాల గురించి ఈ పుస్తకంలో వివరించారు.

పాఠశాల స్థాయిలో ఉన్నప్పుడు మస్క్ పుస్తక పఠనం గురించి ప్రముఖంగా ప్రస్తావించారు. చిన్న వయసులో మస్క్‌ తండ్రి ఆఫీస్‌లో వివిధ కేటగిరీల పుస్తకాలు ఉండేవట. వాటిలో సూపర్‌ హీరోల కథల నుంచి ఎన్‌సైక్లోపీడియా పుస్తకాలు ఉన్నప్పటికీ, కేవలం మూడు మాత్రమే తనలో ఎంతో ఆసక్తి కలిగించాయని జీవితకథలో వెల్లడించారు. ప్రస్తుతం తాను నెలకొల్పిన సంస్థలకు వాటి నుంచే స్ఫూర్తి పొందినట్లు మస్క్ చెప్పారు. మరి, ఆ మూడు పుస్తకాలు ఏంటో చూద్దాం. 

వావ్‌.. గూగుల్ సీఈవో సుందర్‌ పిచాయ్‌ సింప్లిసిటీకి నెటిజన్లు ఫిదా!

ది మూన్‌ ఈజ్‌ ఏ హార్ష్‌ మిస్ట్రెస్‌ (The Moon is a Harsh Mistress): 1966లో రాబర్ట్‌ ఏ హెన్లిన్‌ (Robert A Heinlein) రచించిన ఈ పుస్తకం రాకెట్‌ ప్రయోగాలు, కృత్రిమ మేధ (AI) గురించి తనలో ఆసక్తిని రేకెత్తించిందని తెలిపారు. దాన్ని చదివిన తర్వాతే అంతరిక్షం, గ్రహాల గురించి మస్క్‌ తెలుసుకోవాలనుకున్నారట. ఈ కథలో మైక్ అనే సూపర్‌ కంప్యూటర్‌ కథానాయకులకు సహాయం చేసిన విధానం.. ఏఐ మనుషులకు మేలు చేస్తుందా? ముప్పుగా మారనుందా? అనే ఆలోచనకు తనలో బీజం వేసిందని మస్క్‌ చెప్పినట్లు రచయిత పేర్కొన్నారు.  

ది ఫౌండేషన్‌ సిరీస్‌ (The Foundation Series): 1942-50 మధ్య కాలంలో ఐజాక్‌ అసిమోవ్‌ (Isaac Asimov) రచించిన పౌండేషన్‌ సిరీస్‌.. రోబోటిక్స్‌, జీరో లా (Zeroth Law) గురించి వివరిస్తుంది. ఇందులో రోబోలు వాటి చర్యల ద్వారా మనుషులకు ఎలాంటి హానీ చేయవని, అవి మనుషుల ఆదేశాలను మాత్రమే పాటిస్తాయని ఉంటుంది. ఈ విషయాలే మస్క్‌కు ఏఐ, రోబోలపై ఆసక్తిని కలిగించాయని బయోగ్రఫీలో వెల్లడించారు. 2018లో మస్క్‌ చేసిన ట్వీట్‌లో ఈ పుస్తకం గురించి ప్రస్తావించారు. ‘స్పేస్‌ఎక్స్ నెలకొల్పడానికి స్ఫూర్తి.. పౌండేషన్‌ సిరీస్‌లోని జీరో లా’ అని మస్క్‌ ఆ ట్వీట్‌లో పేర్కొన్నారు. 

ది హిచ్‌హైకరస్ గైడ్‌ టు ది గెలాక్సీ (The Hitchhiker’s Guide to the Galaxy): 1979లో డగ్లస్‌ ఆడమ్స్ (Douglas Adams) ఈ పుస్తకాన్ని రచించారు. తొలుత ఇది బీబీసీ రేడియో కామెడీ సిరీస్‌గా ప్రసారమైంది. ఈ పుస్తకం కుంగుబాటు నుంచి బయటపడేందుకు ఎంతో సాయపడిందని మస్క్‌ చెప్పినట్లు బయోగ్రఫీలో ప్రస్తావించారు. ఇందులో భూమి వినాశనానికి ముందు స్పేస్‌షిప్‌ ఒక వ్యక్తిని కాపాడి,  గెలాక్సీలోకి తీసుకెళుతుంది. తర్వాత జీవితం గురించి అతని ఆలోచనాధోరణి పూర్తిగా మారిపోతుంది. ఈ కథలోని సూపర్‌ కంప్యూటర్‌ జీవితం గురించి మనుషులు అడిగే ప్రశ్నలకు సమాధానం ఇవ్వడం ఆసక్తికరంగా ఉంటుందని, అవి జీవితం పట్ల తన ఆలోచనలను పూర్తిగా మార్చేశాయని మస్క్‌ చెప్పారు.