విదేశాలకు సర్వీసులు నడిపే విమాన సంస్థలకు ఎక్సైజ్‌ సుంకం నుంచి మినహాయింపు

దిల్లీ: విదేశాలకు విమాన సర్వీసులు నడిపే దేశీయ విమాన సంస్థలకు కేంద్రం ఊరటనిచ్చింది. ఆయిల్‌ మార్కెటింగ్‌ కంపెనీల నుంచి ఏటీఎఫ్‌ కొనుగోళ్లపై ఎక్సైజ్‌ సుంకం నుంచి మినహాయింపు ఇచ్చింది. వీటికి 11 శాతం ప్రాథమిక ఎక్సైజ్‌ సుంకం వర్తించబోదని స్పష్టంచేసింది. ఈ మేరకు కేంద్ర ఆర్థిక శాఖ శుక్రవారం ఓ నోటిఫికేషన్‌ వెలువరించింది. జులై 1 నుంచే ఇది వర్తిస్తుందని పేర్కొంది.

ఇటీవల ఇంధన ఎగుమతులపై కేంద్రం పన్ను విధించిన సంగతి తెలిసిందే. ఎగుమతి చేసే పెట్రోల్‌, ఏటీఎఫ్‌కు లీటర్‌కు రూ.6 పన్ను వర్తిస్తుందని నోటిఫికేషన్‌లో కేంద్రం పేర్కొంది. డీజిల్‌కు లీటర్‌కు రూ.13 సుంకం చొప్పున సుంకం వేశారు. ఈ ఉత్తర్వులు కాస్త గందరగోళానికి దారితీశాయి. విదేశాలకు సర్వీసులు నడిపే దేశీయ విమానయాన సంస్థలకూ ఎగుమతి పన్ను వర్తిస్తుందంటూ ఏటీఎఫ్‌ కొనుగోళ్లపై ఆయిల్‌ కంపెనీలు 11 శాతం ఎక్సైజ్‌ సుంకం విధించాయి. దీంతో ఆర్థిక మంత్రిత్వ శాఖ దీనిపై ఓ క్లారిటీ ఇచ్చింది. విదేశాలకు విమానాలు నడిపే సంస్థలకు ఎక్సైజ్‌ సుంకం వర్తించదని పేర్కొంది.