Ford India: ఫోర్డ్‌ మరో నిర్ణయం.. భారత్‌లో ఈవీల తయారీ ప్రణాళిక ఉపసంహరణ!

ఇంటర్నెట్‌ డెస్క్‌: అమెరికాకు చెందిన ప్రముఖ ఆటోమొబైల్‌ సంస్థ ఫోర్డ్‌ మోటార్‌ మరో కీలక నిర్ణయం తీసుకుంది. అంతర్జాతీయ మార్కెట్‌ల కోసం భారత్‌లో విద్యుత్‌ వాహనాల(ఈవీ)ను ఉత్పత్తి చేయాలనే తన ప్రణాళికలను విరమించుకుంది. ఫోర్డ్‌ ఇండియా యాజమాన్యం గురువారం చెన్నై ప్లాంట్‌లోని ఉద్యోగులకు ఈ విషయాన్ని తెలియజేసింది. వాహన, విడిభాగాల రంగానికి ప్రోత్సాహం అందించేందుకు కేంద్ర ప్రభుత్వం ఫిబ్రవరి 2022లో ప్రకటించిన ఉత్పత్తి అనుసంధానిత ప్రోత్సాహకాల(పీఎల్‌ఐ) పథకం కింద ఎంపికయిన సంస్థల్లో ఫోర్డ్ ఒకటి. అయితే, ఇకపై భారత్‌లో పెట్టుబడులకు ముందుకు రానందున.. ఈ జాబితానుంచి వైదొలిగే అవకాశం ఉంది.

ఫోర్డ్ ఇండియా అధికార ప్రతినిధి ఈ విషయాన్ని ధ్రువీకరించారు. ‘పూర్తిస్థాయి సమీక్ష అనంతరం.. భారతీయ ప్లాంట్‌లలో విద్యుత్‌ వాహనాల ఉత్పత్తి చేపట్టకూడదని నిర్ణయించాం. ఇటీవల పీఎల్‌ఐ పథకం కింద మా ప్రతిపాదనను ఆమోదించినందుకు, మొదటినుంచి ఈ ప్రక్రియలో మద్దతుగా నిలిచినందుకు ప్రభుత్వానికి కృతజ్ఞతలు’ అని ఓ అధికారిక ప్రకటన విడుదల చేశారు. భారత్‌లో కార్ల తయారీ కార్యకలాపాలను నిలిపివేస్తున్నట్లు 2021 సెప్టెంబరులో ఈ కంపెనీ ప్రకటించిన విషయం తెలిసిందే. అయితే, వ్యాపార పునర్నిర్మాణంలో భాగంగా.. గుజరాత్‌లోని సనంద్‌, తమిళనాడులోని చెన్నై ప్లాంట్‌లలో ఒకదాన్ని ఈవీల తయారీ కేంద్రంగా మలిచేందుకు.. పీఎల్‌ఐ పథకానికి దరఖాస్తు చేసింది. తాజాగా.. ఈ ప్రణాళికలను ఉపసంహరించుకుంది.

అయితే, ఈ సంస్థ మొదట్లో అనుకున్నట్లుగా.. ఇక్కడి రెండు ప్లాంట్‌లను విక్రయించాలనే ప్రణాళికలను కొనసాగించే అవకాశం ఉందని సమాచారం. ప్రస్తుతం ఈ రెండు ప్లాంట్‌లలో ఉత్పత్తి నిలిచిపోయింది. సనంద్ ప్లాంట్ విక్రయం విషయంలో టాటా మోటార్స్‌తో చర్చలు సానుకూలంగా సాగుతున్నాయి. మరోవైపు.. చెన్నై ఫ్యాక్టరీ విషయంలో మరిన్ని అవకాశాల కోసం చూస్తోందని సంస్థ ప్రతినిధి తెలిపారు.