Published : 23 Jun 2022 19:39 IST

Gautam Adani: గౌతమ్‌ అదానీ @60.. పుట్టిన రోజున కీలక నిర్ణయం!

ఇంటర్నెట్‌ డెస్క్‌: ఆసియాలోనే సంపన్నుడు, అదానీ గ్రూప్‌ ఛైర్మన్‌ గౌతమ్‌ అదానీ (Gautam Adani) సమాజ సేవకు ముందుకొచ్చారు. విద్య, వైద్యం, నైపుణ్య అభివృద్ధి కోసం రూ.60వేల కోట్లు ఖర్చు చేయనున్నట్లు ప్రకటించారు. అదానీ 60వ పుట్టిన రోజును పురస్కరించుకుని అదానీ, ఆయన కుటుంబ సభ్యులు ఈ నిర్ణయం తీసుకున్నారు. అదానీ ఫౌండేషన్‌ ద్వారా ఈ మొత్తాన్ని దాతృత్వ కార్యక్రమాలకు ఖర్చు చేయనున్నారు.

శుక్రవారంతో అదానీకి 60వ ఏళ్లు పూర్తవుతున్న సందర్భంగా అదానీ కుటుంబం ఈ నిర్ణయం తీసుకుంది. గౌతమ్‌ అదానీ తండ్రి శాంతిలాల్‌ అదానీ శత జయంతి కూడా ఇదే ఏడాది కావడంతో పెద్ద ఎత్తున దాతృత్వ కార్యక్రమాలు చేపట్టాలని నిర్ణయించారు. విరాళ మొత్తాన్ని అదానీ ఫౌండేషన్‌ ద్వారా దేశవ్యాప్తంగా విద్య, ఆరోగ్య మౌలిక సదుపాయాల కల్పన, నైపుణ్యాభివృద్ధి కోసం వినియోగించనున్నారు. ఇందుకోసం మూడు కమిటీలు నియమిస్తామని గౌతమ్‌ అదానీ ఓ ఇంటర్వ్యూలో తెలిపారు. ఈ మొత్తాన్ని ఏయే రూపాల్లో ఖర్చు చేయాలనేది ఆయా కమిటీలు నిర్ణయిస్తాయని తెలిపారు. అదానీ కుటుంబ సభ్యులు కమిటీల్లో సహాయక సభ్యులుగా ఉంటారని పేర్కొన్నారు.

1988లో కమొడిటీ ట్రేడింగ్‌తో వ్యాపార రంగంలోకి అడుగుపెట్టిన అదానీ గ్రూప్‌ తన వ్యాపార సామ్రాజ్యాన్ని క్రమక్రమంగా విస్తరించింది. దేశంలో ప్రస్తుతం బొగ్గు, మైనింగ్‌, లాజిస్టిక్స్‌, విద్యుదుత్పత్తి, విద్యుత్‌ పంపిణీ, గ్రీన్‌ ఎనర్జీ, ఎయిర్‌పోర్టులు, డేటా సెంటర్లు, సిమెంట్‌ వంటి వివిధ రంగాల్లో వ్యాపార కార్యకలాపాలు నిర్వహిస్తోంది. ప్రస్తుతం బ్లూమ్‌బెర్గ్‌ ప్రపంచ బిలియనీర్ల జాబితాలో టాప్‌-10లో గౌతమ్‌ అదానీ చోటు దక్కించుకున్నారు. ఈ విషయంలో ముకేశ్‌ అంబానీ కంటే ఒక్క అడుగు ముందున్నారు. ఈ ఒక్క ఏడాదే అదానీ సంపద 15 బిలియన్‌ డాలర్లు పెరగడం విశేషం.

Read latest Business News and Telugu News

 Follow us on Facebook, Twitter, Instagram, Koo, ShareChat and Google News.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.


మరిన్ని

ap-districts
ts-districts

సుఖీభవ

మరిన్ని