కొత్త రేంజ్‌ రోవర్‌ డెలివరీలు ప్రారంభం

దిల్లీ: జాగ్వార్‌ లాండ్‌ రోవర్‌(జేఎల్‌ఆర్‌) తన కొత్త రేంజ్‌ రోవర్‌ కార్ల డెలివరీలను దేశంలో ప్రారంభించినట్లు వెల్లడించింది. ఆరు, ఎనిమిది సిలిండర్‌ పవర్‌ట్రైన్‌లతో వస్తున్న ఈ విలాసవంత కారు ధర రూ.2.38-3.43 కోట్లు(ఎక్స్‌ షోరూం)గా ఉంది. 3 లీటర్‌ పెట్రోలు, డీజిల్‌ ఇంజిన్‌లతో పాటు 4 లీటర్‌ పెట్రోల్‌ పవర్‌ట్రైన్‌ మోడల్‌ కూడా ఉన్నట్లు జేఎల్‌ఆర్‌ ప్రెసిడెంట్‌, ఎండీ రోహిత్‌ సూచి సోమవారం పేర్కొన్నారు. 5, 7 సీట్ల వేరియంట్లతో ఉన్న కొత్త రేంజ్‌ రోవర్‌ దేశంలోని 21 నగరాల్లో లభ్యమవుతోంది.

దీపావళి కల్లా మరో 10 విక్రయ కేంద్రాలు

రూ.250- 300 కోట్ల పెట్టుబడి: కల్యాణ్‌ జువెలర్స్‌

ముంబయి: ఆభరణాల విక్రయ సంస్థ కల్యాణ్‌ జువెలర్స్‌, దేశంలోని దక్షిణేతర విపణుల్లోనూ తన ఉనికిని బలోపేతం చేసుకునే యోచనలో ఉంది. దీపావళి కల్లా ఆయా ప్రాంతాల్లో కంపెనీ సొంతంగా 5, ఫ్రాంచైజీ పద్ధతిలో మరో 5 .. (మొత్తం 10) విక్రయ కేంద్రాలను ప్రారంభించేందుకు రూ.250- 300 కోట్ల పెట్టుబడులు పెట్టనుందని కల్యాణ్‌ జువెలర్స్‌ ఎగ్జిక్యూటివ్‌ డైరెక్టర్‌ రమేశ్‌ కల్యాణ రామన్‌ తెలిపారు. వీటిలో 3 దిల్లీ/ ఎన్‌సీఆర్‌ ప్రాంతంలో, మరో మూడింటిని ఉత్తర ప్రదేశ్‌లో, రెండింటిని మహారాష్ట్రలో; ఒడిశా, చత్తీస్‌గఢ్‌లో ఒకటి చొప్పున ప్రారంభించనున్నట్లు పేర్కొన్నారు. ప్రస్తుతం కల్యాణ్‌ జువెలర్స్‌కు దేశవ్యాప్తంగా 127 విక్రయ కేంద్రాలు ఉన్నాయి.