Sugar Export: పంచదార ఎగుమతిదార్లకు ఊరట!

2021-22 పరిమితుల సడలింపు
అదనంగా 1.2 మిలియన్‌ టన్నులకు అనుమతి

దిల్లీ: పంచదార ఎగుమతులపై ఉన్న 10 మిలియన్‌ టన్నుల పరిమితిని ప్రభుత్వం సడలించనుంది. సెప్టెంబరుతో ముగిసే ప్రస్తుత మార్కెటింగ్‌ సంవత్సరం(2021-22)లో అదనంగా 1.2 మిలియన్‌ టన్నుల ఎగుమతికి అనుమతి ఇవ్వనుంది. 2021-22 అక్టోబరు-సెప్టెంబరులో చక్కెర ఎగుమతులను 10 మిలియన్‌ టన్నులకు పరిమితం చేస్తూ మే నెలలో కేంద్రం నిర్ణయించిన సంగతి తెలిసిందే. దేశీయంగా లభ్యత ఉండేందుకు, ధరలు స్థిరంగా కొనసాగేందుకు ఈ చర్య తీసుకున్న విషయం విదితమే. కాగా, ఇప్పటికే చక్కెర మిల్లులు 10 మిలియన్‌ టన్నుల వరకు ఎగుమతులను చేశాయి. దీంతో ఎగుమతులపై ఉన్న పరిమితిని పెంచాలని పరిశ్రమ కోరుతూ వస్తోంది. ఈ నేపథ్యంలోనే శుక్రవారమిక్కడ జరిగిన ఒక కార్యక్రమం అనంతరం ఆహార కార్యదర్శి సుధాంశు పాండే మాట్లాడుతూ ‘చక్కెర ఎగుమతుల పరిమితిని 1.2 మిలియన్‌ టన్నుల మేర ప్రభుత్వం పెంచనుంద’ని స్పష్టం చేశారు. త్వరలోనే ఇందుకు సంబంధించిన నోటిఫికేషన్‌ జారీ అవుతుందనీ అన్నారు. 2020-21లో 7 మిలియన్‌ టన్నులు; అంతక్రితం ఏడాది 5.96 మి. టన్నుల మేర ఎగుమతులు నమోదయ్యాయి.