Marico: 3% పెరిగిన మారికో లాభం

దిల్లీ: ఎఫ్‌ఎంసీజీ సంస్థ మారికో ఈ ఆర్థిక సంవత్సరం జూన్‌ త్రైమాసికంలో రూ.377 కోట్ల నికర లాభాన్ని నమోదు చేసింది. క్రితం ఆర్థిక సంవత్సరం ఇదే సమయంలో సంస్థ ఆర్జించిన నికర లాభం రూ.365 కోట్లతో పోలిస్తే ఇది  3.28 శాతం ఎక్కువ. కార్యకలాపాల ఆదాయం రూ.2,525 కోట్ల నుంచి 1.3 శాతం పెరిగి రూ.2,558 కోట్లకు చేరింది. ఇందులో దేశీయ విపణి నుంచి ఆదాయం రూ.1,992 కోట్ల నుంచి 3.56 శాతం తగ్గి     రూ.1,921 కోట్లకు పరిమితమైంది. అంతర్జాతీయ విక్రయాలు రూ.533 కోట్ల నుంచి 19.51% పెరిగి రూ.637 కోట్లకు చేరాయి. మొత్తం వ్యయాలు  రూ.2,085 కోట్ల నుంచి రూ.2,076 కోట్లకు తగ్గాయి. బలహీన గిరాకీ పరిస్థితులు, అధిక ద్రవ్యోల్బణంతో ఈ ఆర్థిక సంవత్సరం మిశ్రమంగా ప్రారంభమైందని కంపెనీ ఎండీ, సీఈఓ సౌగాటా గుప్తా వెల్లడించారు. ద్రవ్యోల్బణ ఒత్తిళ్లు తగ్గితే సమీప భవిష్యత్‌లో పరిమాణ వృద్ధిని ఆశిస్తున్నామన్నారు.