జులైలో స్వల్పంగా తగ్గిన ద్రవ్యోల్బణం

దిల్లీ: కూరగాయలు, వంటనూనెల వంటి ఆహార వస్తువుల ధరలు తగ్గడంతో జులైలో రిటైల్‌ ద్రవ్యోల్బణం 6.71 శాతానికి పరిమితమైంది. అయినా వరుసగా ఏడో నెలా రిజర్వ్‌ బ్యాంక్‌ ఆఫ్‌ ఇండియా(ఆర్‌బీఐ) సౌకర్యవంత స్థాయి (6 శాతం) ఎగువనే ఉంది. దీంతో వచ్చే సమీక్షలోనూ ఆర్‌బీఐ  కీలక రేట్లను పెంచొచ్చని భావిస్తున్నారు. రిటైల్‌ ద్రవ్యోల్బణం ఈ ఏడాది జూన్‌లో 7.01 శాతం కాగా , 2021 జులైలో 5.59 శాతంగా నమోదైంది. 2022 ఏప్రిల్‌ నుంచి జూన్‌ వరకు 7 శాతం ఎగువనే ద్రవ్యోల్బణం ఉంది. జాతీయ గణాంక కార్యాలయం (ఎన్‌ఎస్‌ఓ) గణాంకాల ప్రకారం..
* జులైలో ఆహార ద్రవ్యోల్బణం 6.75 శాతానికి చేరింది. జూన్‌లో ఇది 7.75 శాతంగా ఉంది.  కూరగాయల ధరలు మేలో 17.37% పెరగ్గా.. జూన్‌లో 10.90% పెరిగాయి. నూనెలు, కొవ్వుల ధరలు 7.52 శాతం అధికమయ్యాయి.
* ఇంధన ద్రవ్యోల్బణం 10.39 శాతం నుంచి 11.76 శాతానికి చేరింది. మాంసం-చేపలు, పప్పుల ధరలు వరుసగా 9 శాతం, 0.18 శాతం పెరిగాయి. గుడ్ల ధరలు 3.84 శాతం తగ్గగా, పండ్లు 6.41 శాతం ప్రియమయ్యాయి.
* రిటైల్‌ ద్రవ్యోల్బణాన్ని అదుపు చేసేందుకు మే 4న 0.4 శాతం; జూన్‌ సమీక్షలో 0.5 శాతం, ఆగస్టులో 0.5 శాతం మేర రెపో రేటును ఆర్‌బీఐ పెంచిన సంగతి తెలిసిందే.