ఎయిర్‌టెల్‌ ఎండీ, సీఈఓగా గోపాల్‌ విఠల్‌ పునర్నియామకం

వాటాదార్ల ఆమోదం

దిల్లీ: భారతీ ఎయిర్‌టెల్‌ మేనేజింగ్‌ డైరెక్టరు (ఎండీ), సీఈఓగా గోపాల్‌ విఠల్‌ పునర్నియామక ప్రతిపాదనకు కంపెనీ వాటాదార్లు ఆమోదం తెలిపారు. 2023 ఫిబ్రవరి 1 నుంచి అయిదేళ్ల పాటు ఆయన ఈ పదవిలో కొనసాగనున్నారు. పునర్నియామక ప్రతిపాదనకు 97 శాతం మంది అనుకూలంగా ఓటేశారని వార్షిక సాధారణ సమావేశం వివరాలను ఎక్స్ఛేంజీలకు తెలియజేస్తూ ఎయిర్‌టెల్‌ తెలిపింది. ఎండీ, సీఈఓగా గోపాల్‌ విఠల్‌కు చెల్లించే పారితోషికానికి సంబంధించిన ప్రత్యేక ప్రతిపాదనకూ వాటాదార్లు ఆమోదముద్ర వేశారు. ఈ ప్రతిపాదనకు 89.57 శాతం మంది అనుకూలంగా, 10.42 శాతం మంది వ్యతిరేకంగా ఓటేశారని పేర్కొంది. 2018 ఫిబ్రవరి 1న గోపాల్‌ విఠల్‌ను ఎండీ, సీఈఓగా అయిదేళ్ల కాలానికి కంపెనీ పునర్నియమించింది. తాజాగా ఆ సమయాన్ని మరో ఐదేళ్లు పొడిగించడంతో.. 2028 జనవరి 31 వరకు ఆయన ఈ పదవుల్లో కొనసాగనున్నారు. అలాగే వార్షికంగా రూ.9.6 కోట్ల స్థిర వేతనాన్ని పారితోషికంగా చెల్లించేందుకు ప్రతిపాదించారని ఏజీఎం అజెండాలో పేర్కొన్న సంగతి తెలిసిందే. ప్రతి ఆర్థిక సంవత్సరం చివరన వేరియబుల్‌ పే (పనితీరు ఆధారిత ప్రోత్సాహకాలు) కింద వార్షికంగా రూ.6.2 కోట్లు చెల్లించాలనీ అందులో ఉంది. ఒక ఆర్థిక సంవత్సరంలో వార్షిక స్థిర వేతనంలో 90 శాతానికి వేరియబుల్‌ పే మించకూడదని పేర్కొంది. 2021-22లో విఠల్‌కు స్థిర వేతనం రూ.9.1 కోట్లుగా ఉంది. ఇది కాకుండా వేరియబుల్‌ పే అదనం.