విమానాశ్రయాల్లో పక్షి ప్రమాదాల నివారణకు

డీజీసీఏ మార్గదర్శకాలు

దిల్లీ: దేశంలోని విమానాశ్రయాల్లో పక్షులు, ఇతర జంతువులను విమానాలు ఢీకొంటున్న సంఘటనల నేపథ్యంలో ఆ ప్రమాదాల నివారణకు విమానయాన నియంత్రణ సంస్థ డీజీసీఏ శనివారం మార్గదర్శకాలు జారీ చేసింది. ఆయా విమానాశ్రయాల్లో తరచుగా సాధారణ గస్తీని నిర్వహించడంతో పాటు వన్యప్రాణుల కార్యకలాపాలను గమనించినప్పుడు వెంటనే ఆ విషయాన్ని పైలట్లకు తెలియజేసే వ్యవస్థను అభివృద్ధి చేయాలని సూచించింది.
* గత కొన్ని వారాల్లో పక్షుల్ని విమానాలు ఢీకొట్టిన సందర్భాలున్నాయి. ఈ నెల 4న గోఫస్ట్‌ విమానం అహ్మదాబాద్‌ నుంచి చండీగఢ్‌కు వెళ్లాల్సి ఉండగా, పక్షిని ఢీకొట్టడంతో తిరిగి అహ్మదాబాద్‌లోనే ల్యాండ్‌ అయ్యింది.

* గత జూన్‌ 19న పట్నా విమానాశ్రయం నుంచి 185 మంది ప్రయాణికులతో బయల్దేరిన స్పైస్‌జెట్‌ విమానం ఇంజిన్‌లో తలెత్తిన సమస్య కారణంగా నిమిషాల వ్యవధిలోనే అత్యవరసంగా ల్యాండ్‌ అయ్యింది. పక్షిని ఢీకొట్టడంతోనే ఇంజిన్‌లో సమస్య తలెత్తినట్లు తర్వాత గుర్తించారు.

* ఇలాంటి సంఘటనల నేపథ్యంలో శనివారం అన్ని విమానాశ్రయ నిర్వాహకులకు డీజీసీఏ సర్క్యులర్‌ జారీ చేసింది. వైల్డ్‌లైఫ్‌ హజార్డ్‌ మేనేజ్‌మెంట్‌ ప్రోగ్రామ్‌ను సమీక్షించి, విమానాశ్రయాలు, దాని పరిసరాల్లో కచ్చితంగా అమలు చేసేందుకు చర్యలు తీసుకోవాలని ఆదేశించింది.

* వన్య ప్రాణుల కదలికల డేటాను సాధారణ గస్తీల ద్వారా గుర్తించి రికార్డు చేయాలని, పైలట్లకు సమాచారాన్ని చేరవేసే వ్యవస్థను పకడ్బందీగా అమలు చేయాలని, ప్రతి నెలా 7న పక్షి ప్రమాదాల నివారణకు తీసుకున్న చర్యలను తమకు తెలియజేయాలని డీజీసీఏ సర్క్యులర్‌లో కోరింది.