పెరిగిన ఎఫ్‌డీ వడ్డీ రేట్లు

ఈనాడు, హైదరాబాద్‌: ఆర్‌బీఐ రెపో రేటును 50 బేసిస్‌ పాయింట్లు పెంచడంతో.. వెంటనే రెపో ఆధారిత రుణ వడ్డీ రేట్ల (ఆర్‌ఎల్‌ఎల్‌ఆర్‌)ను పెంచిన బ్యాంకులు.. ఇప్పుడు ఫిక్స్‌డ్‌ డిపాజిట్లపై వడ్డీని పెంచడం ప్రారంభించాయి.

* ప్రభుత్వ రంగ బ్యాంకింగ్‌ దిగ్గజం స్టేట్‌ బ్యాంక్‌ ఆఫ్‌ ఇండియా (ఎస్‌బీఐ) తన రూ.2కోట్ల లోపు ఫిక్స్‌డ్‌ డిపాజిట్ల వడ్డీ రేట్లను 15 బేసిస్‌ పాయింట్ల మేరకు పెంచింది. 1-2 ఏళ్ల మధ్య కాల వ్యవధి డిపాజిట్లపై 5.50 శాతం, 3-5 ఏళ్లకు 5.60శాతం, 5-10 ఏళ్లకు 5.65 శాతం వడ్డీనిస్తున్నట్లు ప్రకటించింది. సీనియర్‌ సిటిజన్లకు అదనంగా 0.50శాతం వర్తిస్తుంది. అయిదేళ్ల ‘ఎస్‌బీఐ వుయ్‌కేర్‌’ ప్రత్యేక డిపాజిట్‌ పథకాన్ని సెప్టెంబరు 30 వరకూ పొడిగిస్తున్నట్లు వెల్లడించింది. ఈ పథకంలో సీనియర్‌ సిటిజన్లకు అదనంగా మరో 30 బేసిస్‌ పాయింట్ల మేరకు వడ్డీ లభిస్తుంది.

* సెంట్రల్‌ బ్యాంక్‌ ఆఫ్‌ ఇండియా 1-2 ఏళ్లలోపు ఎఫ్‌డీలపై 5.35 శాతం, 2-3 ఏళ్ల వ్యవధికి 5.40శాతం, 3-5 ఏళ్ల డిపాజిట్లపై 5.40శాతం, 5-10 ఏళ్ల ఎఫ్‌డీపై 5.60 శాతం, 555 రోజుల టర్మ్‌ డిపాజిట్‌పై 5.55 శాతం వడ్డీనిస్తున్నట్లు ప్రకటించింది.

* ఇండియన్‌ ఓవర్సీస్‌ బ్యాంక్‌ (ఐఓబీ) ఏడాది నుంచి 2 ఏళ్లలోపు డిపాజిట్లపై 5.45శాతం, 444 రోజుల వ్యవధి ఎఫ్‌డీలపై 5.60 శాతం, మూడేళ్లు అంతకు మించి వ్యవధికి 5.70 శాతం వడ్డీనిస్తున్నట్ల వెల్లడించింది.

* యాక్సిస్‌ బ్యాంక్‌ 13-17 నెలల వ్యవధి డిపాజిట్లపై 5.60 శాతం, 17-18 నెలల డిపాజిట్లపై 6.05శాతం వరకూ వడ్డీనిస్తోంది. 3-5 ఏళ్ల డిపాజిట్లపై 5.70 శాతం ప్రకటించింది.

* కరూర్‌ వైశ్యా బ్యాంక్‌ 1-2 ఏళ్ల డిపాజిట్‌పై 5.75శాతం, 2-3 ఏళ్ల వ్యవధికి 5.85 శాతం, మూడేళ్లు ఆ పైన వ్యవధి డిపాజిట్లపై 6 శాతం వడ్డీని ఇస్తున్నట్లు తెలిపింది. పెంచిన వడ్డీ రేట్లు ఈ నెల 16 నుంచి అమల్లోకి వస్తాయని ప్రకటించింది. బ్యాంకులన్నీ 60 ఏళ్లు దాటిన వారి డిపాజిట్లపై 0.50 శాతం వడ్డీని అదనంగా ఇస్తాయి.