హైదరాబాద్‌లో 8 శాతం పెరిగిన ఇళ్ల ధరలు

క్రెడాయ్‌ నివేదిక

దిల్లీ: దేశవ్యాప్తంగా ప్రధాన ఎనిమిది ప్రధాన నగరాల్లో ఇళ్ల ధరలు సగటున 5 శాతం పెరిగాయి. దిల్లీ రాజధాని ప్రాంతంలో గరిష్ఠంగా 10 శాతం ధరలు పెరగ్గా...హైదరాబాద్‌లో 8 శాతం వార్షిక వృద్ధి ఇళ్ల ధరల్లో కన్పించింది.  క్రెడాయ్‌, రియల్‌ ఎస్టేట్‌ కన్సల్టెంట్‌ కొలియర్స్‌ ఇండియా, డాటా విశ్లేషణ సంస్థ లీసెస్‌ ఫోరస్‌  ఏప్రిల్‌- జూన్‌ త్రైమాసికానికి సంబంధించి దేశంలోని 8 నగరాలకు సంబంధించి హౌస్‌ ప్రైస్‌ ట్రాకర్‌ రిపోర్ట్‌ 2022ను తాజాగా విడుదల చేశాయి. అహ్మదాబాద్‌లో 9%, కోల్‌కతాలో 8%, పుణెలో 5%, బెంగళూరులో 4 శాతం ధరలు పెరిగాయి. ముంబయిలో అత్యల్పంగా ఒక శాతం మాత్రమే ఇళ్ల ధరలు పెరిగాయి. కార్పెట్‌ విస్తీర్ణం ఆధారంగా ధరల వృద్ధిని విశ్లేషించామని.. హైదరాబాద్‌లో చదరపు అడుగు రూ.9218 చేరిందని నివేదికలో పేర్కొన్నారు. కూలీలు వేతనాలు, నిర్మాణ సామగ్రి ధరలు పెరగడమే ఇళ్ల ధరలు పెరగడానికి కారణమని క్రెడాయ్‌ జాతీయ అధ్యక్షుడు హర్ష వర్ధన్‌ పటోడియా అన్నారు.