యాపిల్‌లో 100 మంది రిక్రూటర్ల కోత

యాపిల్‌ ఇంక్‌ గత వారం వ్యవధిలో కాంట్రాక్ట్‌ పద్ధతిలో పనిచేస్తున్న 100 మంది వరకు రిక్రూటర్లను తొలగించింది. నియామకాలు, వ్యయాలను అదుపులో ఉంచడం కోసం ఈ చర్య తీసుకుంటున్నట్లు ఈ పరిణామాలతో సంబంధమున్న వ్యక్తులను ఉటంకిస్తూ ఒక ఆంగ్ల వార్తా సంస్థ తన కథనంలో పేర్కొంది. కొత్త ఉద్యోగులను నియమించడానికి బాధ్యత వహించే ఈ రిక్రూటర్లనే తొలగించడం అంటే కంపెనీలో నియామకాలు మందగమనం పాలు కానున్నాయని అందులో అంచనా వేసింది. ప్రస్తుత వ్యాపారావసరాల కారణంగా ఈ మార్పులు చేపడుతున్నట్లు తొలగించిన సిబ్బందికి కంపెనీ తెలిపినట్లు సమాచారం. పూర్తి స్థాయి ఉద్యోగులుగా ఉన్న రిక్రూటర్లను మాత్రం కంపెనీ అట్టేపెట్టుకుంటోంది. ఈ నిర్ణయంపై యాపిల్‌ ప్రతినిధి వ్యాఖ్యానించడానికి నిరాకరించారని ఆ కథనం పేర్కొంది. 1,50,000 పైగా ఉద్యోగులున్న ఈ కంపెనీలో ఇది అసాధారణమే అని మార్కెట్‌ వర్గాలు అంటున్నాయి. అయితే టెక్‌ వ్యయాల మందగమనం నేపథ్యంలో ఇటీవలి కొద్ది నెలల్లో మెటా ప్లాట్‌ఫామ్స్‌, టెస్లా, మైక్రోసాఫ్ట్‌, అమెజాన్‌, ఒరాకిల్‌ కార్ప్‌ వంటి కంపెనీలు కూడా ఉద్యోగులను తొలగించిన సంగతి తెలిసిందే.