సంక్షిప్తంగా

* బజాజ్‌ ఎలక్ట్రికల్స్‌ మేనేజింగ్‌ డైరెక్టర్‌, సీఈఓగా అనూజ్‌ పొద్దార్‌ పదోన్నతి పొందారు. ఛైర్మన్‌, ఎండీ పదవిని విడదీసిన కంపెనీ, ఇకపై ఎగ్జిక్యూటివ్‌ డైరెక్టర్‌గా శేఖర్‌ బజాజ్‌ పనిచేయన్నట్లు వెల్లడించింది.

* ఆర్థిక సంస్థల నుంచి రూ.5,000 కోట్ల కాలావధి రుణాన్ని ఎన్‌టీపీసీ తీసుకోనుంది. టెండర్‌లో పాల్గొనడానికి బ్యాంకులు, ఆర్థిక సంస్థలను ఆహ్వానించింది.

* మ్యాక్స్‌ హెల్త్‌కేర్‌లో మొత్తం 27 శాతం వాటాను అమెరికా ప్రైవేట్‌ ఈక్విటీ దిగ్గజం కేకేఆర్‌ మంగళవారం విక్రయించింది. దాదాపు 26.47 కోట్ల షేర్లను విక్రయించిన సంస్థ రూ.9000 కోట్ల వరకు సమీకరించింది.

* హిందుస్థాన్‌ జింక్‌లో ప్రభుత్వానికి ఉన్న 29.53 శాతం వాటా విక్రయాన్ని నిర్వహించేందుకు అయిదు ఇన్వెస్ట్‌మెంట్‌ బ్యాంకర్లను ఖరారు చేశారు. ఐసీఐసీఐ సెక్యూరిటీస్‌, యాక్సిస్‌ క్యాపిటల్‌, సిటీ గ్రూప్‌ గ్లోబల్‌ మార్కెట్స్‌, హెచ్‌డీఎఫ్‌సీ బ్యాంక్‌, ఐఐఎఫ్‌ఎల్‌ సెక్యూరిటీస్‌ ఎంపికైన వాటిలో ఉన్నాయి.

* దేశవ్యాప్తంగా స్మార్ట్‌ పీఓఎస్‌ పరికరాలను ఏర్పాటు చేసేందుకు శామ్‌సంగ్‌ స్టోర్స్‌తో పేటీఎం భాగస్వామ్యం కుదుర్చుకుంది.

* పరిశ్రమ, పరిశోధన, అభివృద్ధి సంస్థల మధ్య భాగస్వామ్యానికి కేంద్రం ప్రత్యేక ప్లాట్‌ఫామ్‌ ‘మంథన్‌’ను ఆవిష్కరించింది. దేశంలో టెక్నాలజీ ఆధారిత వినూత్నతలు, సొల్యూషన్‌లను అమలు చేయడానికి ఇది దోహదపడనుంది.

* కంపెనీ జారీ చేసిన మార్పిడి రహిత డిబెంచర్లకు చెల్లించాల్సిన అసలు, వడ్డీకి సంబంధించిన రూ.51.85 కోట్ల బకాయిల్ని చెల్లించడంలో విఫలమైనట్లు ఫ్యూచర్‌ కన్జూమర్‌ నియంత్రణ సంస్థలకు సమాచారమిచ్చింది. ఈ నెల 15న రూ.10.73 కోట్ల వడ్డీ, రూ.41.12 కోట్ల అసలు చెల్లించాల్సి ఉందని తెలిపింది.

* సిర్మా ఎస్‌జీఎస్‌ టెక్‌ పబ్లిక్‌ ఇష్యూకు రెండో రోజున 92% స్పందన లభించింది. 2,85,63,816 షేర్లకు గాను 2,62,69,148 షేర్లకు బిడ్లు దాఖలయ్యాయి. రిటైల్‌ మదుపర్ల విభాగంలో 1.56 రెట్ల స్పందన లభించింది.

*  హెచ్‌డీఎఫ్‌సీ అసెట్‌ మేనేజ్‌మెంట్‌లో 5.58% వాటాను ప్రమోటర్‌ బీఆర్‌డీఎన్‌ ఇన్వెస్ట్‌మెంట్‌ మేనేజ్‌మెంట్‌ రూ.2,300 కోట్లకు ఓపెన్‌ మార్కెట్‌ లావాదేవీ ద్వారా క్రయించింది.