5జీ స్పెక్ట్రమ్‌ ముందస్తు చెల్లింపులు రూ.17,876 కోట్లు

దిల్లీ: భారతీ ఎయిర్‌టెల్‌, రిలయన్స్‌ జియో, వొడాఫోన్‌ ఐడియా, అదానీ డేటా నెట్‌వర్క్స్‌లు టెలికాం విభాగానికి (డాట్‌)   రూ.17,876 కోట్ల ముందస్తు చెల్లింపులు చేశాయి. ఇటీవల కేంద్రం నిర్వహించిన 5జీ స్పెక్ట్రమ్‌ వేలంలో పాల్గొన్న ఈ సంస్థలు రూ.1.5 లక్షల కోట్లకు పైగా  విలువైన స్పెక్ట్రమ్‌ను దక్కించుకున్న సంగతి తెలిసిందే. ఇందుకోసం 20 వార్షిక వాయిదాల్లో చెల్లింపులు చేసేందుకు టెలికాం సంస్థలకు వీలుంది. అయితే భారతీ ఎయిర్‌టెల్‌ మాత్రం 4 వార్షిక వాయిదాల మొత్తం రూ.8,312.4 కోట్లను ముందే చెల్లించింది. మిగిలిన సంస్థలు ముందస్తు చెల్లింపులు మాత్రమే జరిపాయి. రిలయన్స్‌ జియో     రూ.7,864.78 కోట్లు, వొడాఫోన్‌ ఐడియా   రూ.1,679.98 కోట్లు, అదానీ డేటా నెట్‌వర్క్స్‌ రూ.18.94 కోట్లు చెల్లించడంతో.. మొత్తంమీద టెలికాం విభాగానికి రూ.17,876 కోట్లు లభించాయి.