చెల్లింపుల వ్యవస్థల్లో ఫీజులపై స్పందించండి

ప్రజలకు ఆర్‌బీఐ విజ్ఞప్తి

ముంబయి: చెల్లింపుల వ్యవస్థల్లో జరిపే లావాదేవీలపై అమలు చేస్తున్న ఫీజులు, ఛార్జీల విషయంలో స్పందించాలంటూ ప్రజలను రిజర్వ్‌ బ్యాంక్‌ ఆఫ్‌ ఇండియా(ఆర్‌బీఐ) కోరుతోంది. ఈ లావాదేవీలపై ఛార్జీలు ప్రజలకు అందుబాటులో ఉండడంతో పాటు; వీటిలో పాల్గొనే కంపెనీలకు ఆర్థికంగా ప్రోత్సాహకరంగా ఉంచే లక్ష్యంతో ఈ అడుగు వేసింది. ఐఎమ్‌పీఎస్‌, నెఫ్ట్‌, ఆర్‌టీజీఎస్‌, యూపీఐ వంటి వాటితో పాటు డెబిట్‌ కార్డులు, క్రెడిట్‌ కార్డులు, ప్రీపెయిడ్‌ పేమెంట్‌ ఇన్‌స్ట్రుమెంట్స్‌(పీపీఐలు) పద్ధతులను చెల్లింపులకు వినియోగిస్తున్న సంగతి తెలిసిందే. ఈ నేపథ్యంలోనే ‘ఛార్జెస్‌ ఇన్‌ పేమెంట్‌ సిస్టమ్స్‌’ పేరుతో చర్చాపత్రాన్ని ఆర్‌బీఐ బుధవారం విడుదల చేసింది. అక్టోబరు 30లోగా ఈ అంశంపై  ప్రజల నుంచి సమాధానాలను కోరుతోంది. ఈ చెల్లింపుల లావాదేవీ వ్యవస్థల్లో పలు ఇంటర్మీడియటరీలు కూడా ఉండడంతో, ఛార్జీలు అధికంగా ఉంటున్నాయని, పారదర్శకంగా లేవని వినియోగదార్ల నుంచి ఫిర్యాదులు వస్తున్న నేపథ్యంలో, ఆర్‌బీఐ అభిప్రాయ సేకరణకు దిగింది.