ప్యాకేజ్డ్‌ కమొడిటీల్లో ప్రధాన వస్తువుల వివరాలు ప్యాక్‌లపై ముద్రించాల్సిందే!

31లోపు స్పందించాలని ప్రజలను కోరిన కేంద్రం  

దిల్లీ: ప్యాకేజ్డ్‌ కమొడిటీల్లోని ప్రధాన వస్తువుల వివరాలను ప్యాక్‌లపై బ్రాండ్‌ పేరు/ప్రోడక్ట్‌ లోగోతో ముద్రించడం తప్పనిసరి చేయాలనే ప్రతిపాదనపై ప్రజల నుంచి కేంద్రం సలహాలు ఆహ్వానించింది. ఈ నెల 31లోపు ఈ ప్రతిపాదనపై స్పందించాలని కోరింది. లీగల్‌ మెట్రాలజీ (ప్యాకేజ్డ్‌ కమొడిటీస్‌) రూల్స్‌, 2011లో ప్యాకేజ్డ్‌ కమొడిటీలోని ప్రధాన వస్తువుల కాంపోజిషన్‌ వివరాలు ముద్రించేలా ఒక నిబంధన చేర్చామని ఆహార, వినియోగదార్ల మంత్రిత్వ శాఖ బుధవారం వెల్లడించింది. ఈ నిబంధన మెకానికల్‌ లేదా ఎలక్ట్రిక్‌ కమొడిటీలకు వర్తించదని పేర్కొంది. చాలా మంది తయారీదార్లు/ప్యాకర్లు/దిగుమతిదార్లు ప్యాకేజ్డ్‌ కమొడిటీస్‌లోని ప్రధాన కాంపోజిషన్‌ వివరాలు ప్యాక్‌పై ముద్రించడం లేదని గుర్తించిన మంత్రిత్వ శాఖ, ఈ నిబంధనను తప్పనిసరి చేయాలని భావిస్తున్నట్లు సమాచారం. ప్రజలతో పాటు పరిశ్రమలు, అసోసియేషన్లు, వినియోగదార్లు, స్వచ్ఛంద వినియోగదారు సంస్థలు కూడా  తమ సలహాలు, సూచనలు పంపాల్సిందిగా మంత్రిత్వ శాఖ కోరింది.