హైదరాబాద్‌ సహా ఏడు నగరాల్లో కార్యాలయ లీజు రెట్టింపు

జేఎల్‌ఎల్‌ ఇండియా నివేదిక

దిల్లీ: కార్యాలయాల లీజు జులైలో రెట్టింపునకు మించి పెరిగినట్లు స్థిరాస్తి కన్సల్టింగ్‌ సంస్థ జేఎల్‌ఎల్‌ ఇండియా తెలిపింది. దేశవ్యాప్తంగా 7 నగరాల్లో కార్యాలయాల లీజింగ్‌ గత నెలలో 8.8 మిలియన్‌ చదరపు అడుగులకు చేరినట్లు ‘నెలవారీ కార్యాలయ లీజు ట్రాకర్‌’లో వెల్లడించింది. 2021 జులైలో ఇది 3.9 మిలియన్‌ చ.అ. మేరే ఉంది. ఈ ఏడాది జూన్‌ నాటి 5.8 మిలియన్‌ చ.అ. కంటే కూడా జులైలో అధికమే. హైదరాబాద్‌, దిల్లీ-ఎన్‌సీఆర్‌, ముంబయి, బెంగళూరు, చెన్నై, పుణె, కోల్‌కతాలలోని అన్ని రకాల కార్యాలయ భవనాల్లోని లీజు లావాదేవీల ఆధారంగా నివేదికను రూపొందించారు. జులై లావాదేవీల్లో 85 శాతం వాటా బెంగళూరు, ముంబయి, దిల్లీ-ఎన్‌సీఆర్‌లదే. ఐటీ కంపెనీలే లీజింగ్‌లో  కీలకంగా ఉన్నాయి. ఇవే 53 శాతం వాటా సొంతం చేసుకున్నాయి. బ్యాంకింగ్‌, ఆర్థిక సేవలు, బీమా (బీఎఫ్‌ఎస్‌ఐ) విభాగం వాటా 18 శాతంగా ఉంది.