2 నుంచి శామ్‌సంగ్‌ ఫోల్డబుల్‌ ఫోన్ల విక్రయాలు

ఈనాడు, హైదరాబాద్‌: అత్యంత ఖరీదైన 5జీ స్మార్ట్‌ఫోన్లు గెలాక్సీ జడ్‌ ఫ్లిప్‌ 4, గెలాక్సీ జడ్‌ ఫోల్డ్‌ 4లను సెప్టెంబరు 2 నుంచి దేశీయంగా విక్రయిస్తామని శామ్‌సంగ్‌ ఎలక్ట్రానిక్స్‌ వెల్లడించింది. ముందస్తు బుకింగ్‌ చేసుకున్న వారికి ఈ నెల 27 నుంచే ఫోన్లను డెలివరీ చేస్తామని కంపెనీ ప్రోడక్ట్‌ మార్కెటింగ్‌ అధిపతి ఆదిత్య బబ్బర్‌ గురువారం ఇక్కడ తెలిపారు. ఫోల్డ్‌4 ధరల శ్రేణి రూ.1,54,999 నుంచి రూ.1,84,999 కాగా,  ఫ్లిప్‌4 ధరల శ్రేణి రూ.89,999 నుంచి రూ.97,999 మధ్య ఉంది. ప్రస్తుతం ఈ ఫోన్లను దిగుమతి చేసుకుని, విక్రయిస్తున్నామని.. దేశీయంగానూ ఉత్పత్తిని ప్రారంభించే అవకాశాలున్నాయని పేర్కొన్నారు.