ఐఫోన్‌, ఐప్యాడ్‌లలో భద్రతా లోపాలు

హెచ్చరించిన యాపిల్‌

శాన్‌ఫ్రాన్సిస్కో: ఐఫోన్లు, ఐప్యాడ్‌లు, మ్యాక్‌లలో భద్రతాపరమైన లోపాలు తలెత్తవచ్చని టెక్‌ దిగ్గజం యాపిల్‌ హెచ్చరించింది. సైబర్‌ నేరగాళ్లు ఈ పరికరాలను పూర్తిగా తమ నియంత్రణలోకి తీసుకునే ప్రమాదం ఉందని తెలిపింది. ఈ లోపాల అంశంపై వచ్చిన నివేదికపై తమకు పూర్తిగా అవగాహన ఉన్నట్లు పేర్కొంది. భద్రతా లోపాలపై రెండు నివేదికలను యాపిల్‌ విడుదల చేసింది. భద్రతా ముప్పు ఉన్న ఐఫోన్‌ 6ఎస్‌, ఆ తర్వాతి మోడళ్లు, అయిదో తరం ఐప్యాడ్‌, ఆ తర్వాతి మోడళ్లు, అన్ని ఐప్యాడ్‌ ప్రో మోడళ్లు, ఐప్యాడ్‌ ఎయిర్‌ 2, మ్యాక్‌ఓఎస్‌ మాంటెరీపై నడుస్తున్న మ్యాక్‌ కంప్యూటర్‌లను అప్‌డేట్‌ చేసుకోవాల్సిందిగా వినియోగదార్లకు భద్రతా నిపుణులు సూచిస్తున్నారు. యాపిల్‌ వివరణ ప్రకారం.. ఈ పరికరాలపై హ్యాకర్లు పూర్తి పట్టు చేపట్టే ప్రమాదం ఉందని, వారికి నచ్చినట్లు వినియోగించుకోవచ్చని సోషల్‌ప్రూఫ్‌ సెక్యూరిటీ సీఈఓ రాచెల్‌ టొబాక్‌ తెలిపారు.