విదేశాల్లో చెల్లించిన పన్ను క్లెయింకు గడువు పెంపు

దిల్లీ: విదేశాల్లో చెల్లించిన పన్నుకు సంబంధించి క్లెయిం చేసుకునేందుకు అసెస్‌మెంట్‌ సంవత్సరం ముగిసే వరకు గడువు ఇస్తున్నట్లు ఆదాయపు పన్ను విభాగం వెల్లడించింది. పన్ను చెల్లింపుదారులు నిర్ణీత గడువు లోపు ఐటీ రిటర్నులు దాఖలు చేసిన సందర్భంలోనే ఈ వెసులుబాటు ఉంటుందని శుక్రవారం వెల్లడించింది. ఫారిన్‌ ట్యాక్స్‌ క్రెడిట్‌ (ఎఫ్‌టీసీ) క్లెయిం చేసుకున్న సందర్భంలో ఫారం-67తో పాటు, అవసరమైన అన్ని పత్రాలనూ అసలు రిటర్నులు దాఖలు చేసే సమయంలోనే జత చేయాల్సి వచ్చేది. దీనివల్ల కొన్నిసార్లు ఎఫ్‌టీసీ క్లెయింలో ఇబ్బందులు తలెత్తేవి. దీన్ని సవరిస్తూ.. సంబంధిత మదింపు సంవత్సరం (అసెస్‌మెంట్‌ ఇయర్‌) ముగిసేలోపు ఫారం-67 సమర్పించాలని పన్ను విభాగం తెలిపింది. ప్రస్తుత ఆర్థిక సంవత్సరంలో దాఖలు చేసిన అన్ని ఎఫ్‌టీసీ క్లెయింలకూ ఇది వర్తిస్తుందని తెలిపింది.