డీమ్యాట్‌ ఖాతాల్లో షేర్ల లావాదేవీలకు బ్లాక్‌ చేయడం తప్పనిసరి

నవంబరు 14 నుంచి అమలు

దిల్లీ: షేర్ల లావాదేవీలకు డీమ్యాట్‌ ఖాతాల్లో మదుపర్లు సెక్యూరిటీలను బ్లాక్‌ చేయడం తప్పనిసరని మార్కెట్ల నియంత్రణ సంస్థ సెబీ శుక్రవారం ప్రకటించింది. నవంబరు 14 నుంచి ఇది తప్పనిసరని సెబీ సర్క్యూలర్‌లో పేర్కొంది. ప్రస్తుతం ఈ సదుపాయం మదుపర్లకు ఐచ్ఛికంగా ఉంది. ఈ విధానంలో మదుపరి విక్రయించాలనుకుంటున్న షేర్లను వారి డీమ్యాట్‌ ఖాతాలో క్లియరింగ్‌ కార్పొరేషన్‌కు అనుకూలంగా బ్లాక్‌ చేస్తారు. ఆగస్టు 1 నుంచి సెక్యూరిటీలను బ్లాక్‌ చేసుకునే సౌలభ్యాన్ని డీమ్యాట్‌ ఖాతాల్లో కల్పించింది. ఎర్లీ పే-ఇన్‌ పద్ధతి కూడా అందుబాటులో ఉంటుంది. దీని ప్రకారం.. ఖాతాదారు డీమ్యాట్‌ ఖాతా నుంచి క్లియరింగ్‌ కార్పొరేషన్‌ సంబంధిత ఖాతాకు షేర్లను బదిలీ చేస్తారు. లావాదేవీ పూర్తికాకుంటే షేర్లు మళ్లీ మదుపరి ఖాతాకు వచ్చేస్తాయి.