4 రోజుల సీబీఐ కస్టడీకి ముంబయి మాజీ పోలీస్‌ కమిషనర్‌

ఎన్‌ఎస్‌ఈ ఫోన్‌ ట్యాపింగ్‌ కేసు

దిల్లీ: నేషనల్‌ స్టాక్‌ ఎక్స్ఛేంజ్‌(ఎన్‌ఎస్‌ఈ) ఉద్యోగుల ఫోన్లను అక్రమంగా ట్యాపింగ్‌ చేసినట్లుగా ఆరోపణలు ఎదుర్కొంటున్న ముంబయి మాజీ పోలీస్‌ కమిషనర్‌ సంజయ్‌ పాండేను కేంద్ర దర్యాప్తు సంస్థ(సీబీఐ) 4 రోజుల కస్టడీకి తీసుకుంది. ఇప్పటికే అతను ఎన్‌ఫోర్స్‌మెంట్‌ డైరెక్టరేట్‌(ఈడీ) దర్యాప్తు చేస్తున్న కేసులో జుడీషియల్‌ కస్టడీలోనే ఉన్నారు. సీబీఐ సంజయ్‌ను తమ కస్టడీకి అప్పగించాలని సీబీఐ ప్రత్యేక న్యాయస్థానం వద్ద కోరగా, 4 రోజుల విచారణకు అనుమతి లభించింది. పాండేతో పాటు ఎన్‌ఎస్‌ఈ మాజీ ఎండీ, సీఈఓలు చిత్రా రామకృష్ణ, రవి నరైన్‌లను కూడా సీబీఐ ఈ కేసులో చేర్చింది. ఎన్‌ఎస్‌ఈ సెక్యూరిటీ ఆడిట్‌ నిర్వహించే ఐసెక్‌ సెక్యూరిటీస్‌ ప్రై.లి, 2009-17 మధ్య కాలంలో ఎన్‌ఎస్‌ఈ ఉద్యోగుల ఫోన్లను అక్రమంగా ట్యాప్‌ చేసిందని సీబీఐ వెల్లడించింది. ఈ కంపెనీని 2001 మార్చిలో పాండే స్థాపించారు. 2006 మేలో కంపెనీ డైరెక్టర్‌ హోదా నుంచి ఆయన బయటకొచ్చేశారు. ఆ తర్వాత అతని కుమారుడు, తల్లి కంపెనీ బాధ్యతలు తీసుకున్నారు.