నెలకు రూ.700 కోట్ల రుణాలు: శామ్‌సంగ్‌

యాక్సిస్‌ బ్యాంక్‌తో కలిసి క్రెడిట్‌కార్డు ఆవిష్కరణ

దిల్లీ: తమ ఖరీదైన మడతపెట్టే స్మార్ట్‌ఫోన్ల అమ్మకాలను రెట్టింపు చేసుకోవాలని భావిస్తున్న శామ్‌సంగ్‌, ఇందుకోసం యాక్సిస్‌బ్యాంక్‌తో కలిసి కో-బ్రాండెడ్‌ క్రెడిట్‌ కార్డును ఆవిష్కరించింది. ఆయా ఉత్పత్తులపై ఉన్న ఆఫర్లకు తోడు, ఏడాది మొత్తంమీద శామ్‌సంగ్‌ ఉత్పత్తుల కొనుగోలుపై రూ.10,000-20,000 వరకు నగదు వెనక్కి ఇస్తామని పేర్కొంది. శామ్‌సంగ్‌ ఉత్పత్తుల కొనుగోలు కోసం శామ్‌సంగ్‌ ఫైనాన్స్‌ ప్లస్‌ ద్వారా ఇస్తున్న రుణ లావాదేవీల్లో 3 రెట్ల వృద్ధి లభిస్తోందని శామ్‌సంగ్‌ ఇండియా సీనియర్‌ వైస్‌ ప్రెసిడెంట్‌ (మొబైల్‌వ్యాపారం) రాజు పుల్లన్‌ తెలిపారు. గతేడాది నెలకు రూ.250 కోట్ల రుణాలు ఈ ప్లాట్‌ఫామ్‌పై ఇవ్వగా, ఈ ఏడాది సగటున నెలకు రూ.700 కోట్ల మేర జారీ చేస్తున్నట్లు వివరించారు. 2017లో ప్రారంభించిన శామ్‌సంగ్‌ పేలో 3 కోట్ల మంది నమోదిత వినియోగదారులున్నారని చెప్పారు.