కారు విక్రయాల్లో భారత్‌ దూకుడు

ప్రాంతీయంగా, అంతర్జాతీయంగానూ మెరుగు

మూడీస్‌ అంచనాలు

చిప్‌ కొరత తీరుతున్నందున, ప్రస్తుత పండగ సీజనులో భారత వాహన పరిశ్రమ తన ప్రాంతీయ, అంతర్జాతీయ పోటీదార్ల కంటే మెరుగ్గా కార్ల విక్రయాలను సాధించొచ్చని మూడీస్‌ ఇన్వెస్టర్‌ సర్వీస్‌ పేర్కొంది. సానుకూల సంకేతాల కారణంగా దేశంలో కార్ల అమ్మకాలు ఈ సంవత్సరం 12.5 శాతం మేర, వచ్చే ఏడాది మరో 4 శాతం మేర వృద్ధి సాధించొచ్చని అంచనా వేసింది. ‘కార్ల అమ్మకాల్లో ఈ ఏడాదిలో భారత్‌ వెలిగిపోతోంది. 2022లో ఇప్పటిదాకా అమ్మకాలు స్థిరంగా ఉన్నాయి. ప్రస్తుత పండగల కారణంగా మరింత రాణించొచ్చ’ని తాజా నివేదికలో పేర్కొంది. స్థూల ఆర్థిక వాతావరణం బలంగా ఉండడం; సెమీకండక్టర్‌ కొరత తీరుతుండడంతో ఇది సాధ్యం కావొచ్చని పేర్కొంది. ‘ప్రపంచంలోనే అతిపెద్ద వాహన మార్కెట్‌ అయిన చైనాలో ఈ ఏడాది వాహన అమ్మకాలు 4%  మాత్రమే పెరగొచ్చు. 2023లో 3.5 శాతం వృద్ధి కనిపించొచ్చు. 2023 కల్లా చైనా, భారత్‌లలో వాహన అమ్మకాలు 2018 నాటి స్థాయికి చేరొచ్చు. జపాన్‌లో మాత్రం రికవరీకి సమయం పట్టొచ్చ’ని తెలిపింది.