వాహనాలు రయ్‌..రయ్‌

11% పెరిగిన రిటైల్‌ విక్రయాలు

దిల్లీ: దేశీయంగా వాహన రిటైల్‌ విక్రయాలు సెప్టెంబరులో 11 శాతం వృద్ధి చెందాయి. పండుగ సీజన్‌లో తయారీ కంపెనీల నుంచి వాహన సరఫరా పెరిగిందని, ఫలితంగా వినియోగదార్లకు డీలర్లు ఎక్కువ సంఖ్యలో కార్లను అందజేయగలిగారని వాహన డీలర్ల సమాఖ్య ఫాడా వెల్లడించింది. అక్టోబరులో అమ్మకాలు మరింత పెరిగే అవకాశం ఉందని అంచనా వేసింది. గత దశాబ్ద కాలంలో ప్రయాణికుల వాహన విభాగంలో ఈ ఏడాదే మెరుగైన విక్రయాలు నమోదయ్యే అవకాశం ఉందని డీలర్లు పేర్కొన్నారు. ట్రాక్టర్లు, కొన్ని త్రిచక్ర వాహన వేరియంట్లు మినహా ప్రయాణ, వాణిజ్య, ద్విచక్ర వాహన విక్రయాల్లో క్రితం ఏడాదితో పోలిస్తే మంచి వృద్ధి నమోదైంది. ఫాడా గణాంకాల ప్రకారం.. మొత్తం వాహన రిటైల్‌ విక్రయాలు 2021 సెప్టెంబరులో 13,19,647 కాగా, గత నెలలో 14,64,001కు చేరాయి. ఇందులో ప్రయాణికుల వాహన విక్రయాలు 2,37,502 నుంచి 10 శాతం పెరిగి 2,60,556కు చేరాయి.

మెరుగైన సెమీ కండక్టర్ల సరఫరా
పండుగ సీజన్‌లో కొత్త వాహనాలను కొనుగోలు చేసేందుకు వినియోగదార్లు ఆసక్తి కనబరుస్తున్నారని ఫాడా అధ్యక్షుడు మనీశ్‌ రాజ్‌ సింఘానియా తెలిపారు. సెమీ కండక్టర్ల సరఫరా కూడా మెరుగుపడటంతో తయారీలోనూ ఇబ్బందులు తొలగిపోయాయని పేర్కొన్నారు. అలాగే అత్యాధునిక సదుపాయాలతో వస్తున్న కార్ల విడుదల పెరగడం కూడా విక్రయాల్లో వృద్ధికి దోహదం చేసిందన్నారు.